qanun-məşvərətçi orqan olur.
Qanun-məşvərətçi orqanın hökmdardan sonra ən başlıca siması isə vəzirdir. Lakin vəzir, artıq öncə söylənilən fikirlərdən məlum olduğu kimi, siyasi arenaya heç də qanun-məşvərətçi orqanın təsis edilməsi ilə daxil olmamışdır, onun siyasi arenada görünməsi qanun-məşvərətçi orqanın təsis edilməsindən daha öncə baş vermişdi, çox yəqin ki əksinə, qanun-məşvərətçi orqan siyasi arenaya hökmdar tərəfindən məhz vəzirin təşəbbüsü ilə və vəzirin öz fəaliyyət dairəsini genişləndirməsi nəticəsində daxil edilmişdir. Belə ki, saraya bir məmur olaraq vəzirdən öncə daxil olanların və möhkəmlənənlərin, yəni xəzinədar və cəllad statuslarını daşıyanların tiran tərəfindən idarə olunmasının əsasında qanun deyil, hökmdarın avtoriteti dururdu. Xəzinədarın və cəlladın fəaliyyət sahələri bir o qədər də mürəkkəb olmadığından, bu sahələrin qanunla reqlamentasiya olunmasına da elə bir ehtiyac yox idi. Qanunla reqlamentasiya olunmalı olan sahələr vəzirin məsləhətçi, müşavir statusunda fəaliyyət göstərdiyi zaman aşkara çıxdı. Vəzir hökmdara hansı işlərin görülməsi barədə, eləcə də hansı işləri kimlərə, hansı təbiətdə olan insanlara həvalə etmək barədə məsləhətlər verməklə təkcə iş bölgüsündə deyil, həm də iş bölgüsü vasitəsilə həmçinin vəzifə bölgüsündə və hətta vəzifələrin təsis olunmasında da mühüm əhəmiyyət kəsb edir və bununla da həm də qanun yaradıcılığının bir ictimai-siyasi hadisə olaraq yer almasında əhəmiyyətli rol oynayır. Çünki qanun yaradıcılığı vəzifələrin təsis olunmasından sonra başlayır və onun məntiqi davamı olaraq çıxış edir.
Qanun-məşvərətçi orqanın təsis olunması da təbii ki vəzifələrin təsis olunmasından sonra baş verməlidir.
Bununla yanaşı, qanun-məşvərətçi orqanın meydana çıxması qanunverici hakimiyyətin hökmdar hakimiyyətindən bir qədər ayrılmasının başlanğıcı kimi də anlaşıla bilər.
Hökmdar hakimiyyətindən məhkəmə hakimiyyətinin ayrılması isə məmurun yeddinci tarixi tipi – qazı - meydana çıxdığı zaman baş verir.
Əgər məmurun birinci, ikinci və üçüncü tarixi tiplərinin – kvartirmeysterin, xəzinədarın və cəlladın – hökmdar tərəfindən idarə olunmasının əsasında qanun deyil, hökmdarın avtoriteti dururdusa, onun dördüncü tarixi tipi – vəzir – qanun ideyasının müəllifi kimi çıxış edirdisə, məmurun beşinci və altıncı tarixi tipləri - vəkil və daxili təyinatlı cəza ordusunun başçısı –qanun qüvvəsinə malik ilk hüquqi akt hesab edilə bilən yazılı fərmanla vəzifəyə təyin edilirdilərsə, onun yeddinci tarixi tipi – qazı – yalnız qanunun determinizm üzərində qurulması və artıq ümumən qəbul olunmuş bir reallıq faktına çevrilməsi şəraitində fəaliyyət göstərə bilir və mövcud ola bilir.
Qazı siyasi-ictimai əhəmiyyət daşıyan bir sima olaraq siyasət meydanına daxil olduğu zamandan başlayaraq qanun məmur fəaliyyətinin zəruri əsasına çevrilir və bunsuz mümkün olmur.
Bütün bunlarla yanaşı belə bir məqamı da diqqətə çatdırmaq lazımdır ki, qanun ümumiyyətlə hökmdarın üzvi iradəsinin korşalması, başqa cür deyilərsə, dövlətin bütöv bir sosial orqanizm olaraq üzvi iradəsinin hökmdarın rasional iradəsindən fərqlənməsi və hökmdarın rasional iradəsi ilə əvəzlənməsi məqamında tarix meydanına çıxır və monarxın rasional iradəsinin ifadəçisi statusunu kəsb edir, və sonradan, xüsusən də siyasi-ictimai əhəmiyyəti öncə xatırlanan və xüsusi olaraq vurğulanan qazı institutu ictimai həyatda mühüm əhəmiyyət daşıyan bir hadisə olaraq siyasət meydanına daxil olduğu zamandan sonra hətta təbəə iradəsinin ifadəçisinə də çevrilir. Belə ki, əgər qanun hökmdarın daxildən qaynaqlanan əxlaqi hissdən, təbii təyinat ideyasının emosional mücəssəməsi olan ədalət duyğusundan artıq fərqlənən, bəzən hətta uzaq düşən iradəsinin yerinə yetirilməsi bir zərurətə çevrildiyi zaman meydana gəlmişdisə, qazı fenomeninin siyasət meydanına çıxması ilə məiyyət mənşəli əvəz prinsipi qanun yaradıcılığının əsasına qoyulur. Qanun bu andan başlayaraq ədalət duyğusunun məiyyət baxımından ifadəçisi olan əvəz prinsipini demək olar ki bütün hallarda bu və ya digər şəkildə özündə ehtiva edir.
Bu məqamdan başlayaraq, qanunlar məiyyətin və bütövlükdə təbəənin təkcə nə etməli olduğunu deyil, həm də nə etməməli olduğunu da müəyyənləşdirməklə yanaşı həm də qadağan olunmuş əməllə cəza arasındakı münasibətlərə birmənalı xarakter verir.
Məmurun yeddinci tarixi tipi olan qazı qadağan olunmuş əməl ilə cəza arasındakı birmənalı münasibətlərin bilavasitə reallaşdırıcısı olaraq sosial-siyasi status qazanır və məhkəmə adlandırılan həmin o institusional hakimiyyət forması da bu statusdan doğulur. Məhkəmə hakimiyyəti sistemi ədalət hissinin daxildən, dərinliklərdən qaynaqlanan möhtəşəm bir yaşantı olaraq itirildiyi dövrlərdə, əxlaqın və əxlaqı özünə hopduran adətin qanun tərəfindən sıxışdırıldığı və qanunla əvəz edildiyi şəraitdə baş verir. Məhkəmə hakimiyyəti hökmdar hakimiyyəti ilə yanaşı duran bir hakimiyyət forması olaraq meydana çıxır və onun meydana çıxması ilə bağlı cəza üsulları da müxtəlifləşir, necə deyərlər daha rəngarəng olur.
Cəza vermək ümumiyyətlə götürüldükdə isə insana çəkdirilən əzabın bu əzabı ona çəkdirənlə bölüşdürülməsi kimi dəyərləndirilə bilər. Bu halda dövlətin sanksiyalaşdırdığı cəza qanunu həm də onunla izah oluna bilər ki, təbəələrə (sonradan vətəndaşlara) digər təbəələr (digər vətəndaşlar) tərəfindən çəkdirilən əzab son nəticədə həm də dövlətə çəkdirilən əzabdır və dövlət bu əzabı ona əzab çəkdirənlə bölüşdürür. Amma bu məqam daha çox tiranın və qismən də zadəganın hüquqi instinktlərinə uyğun gəlir. Təbəənin hüquqi instinktləri isə bütövlükdə daha çox bir qədər öncə xatırlanan və təhlil olunan əvəz prinsipində öz dəqiq ifadəsini tapır.
Müqayisə üçün belə bir məlum faktı da konstatasiya edək ki, məiyyət üçün son dərəcə doğma və anlaşıqlı olan, qanun kimi qavranılan əvəz prinsipinə tiran özünün klassik tarixi simasında heç cür əməl etmirdi, əksinə «zərurət qanunu tanımır» prinsipi ilə fəaliyyət göstərirdi. Cinayət və cəza arasında münasibətlərə birmənalı qanun statusunun verilməsi yalnız tiraniyanın son, böhran mərhələsindən başlayaraq yer alır.
Bu mərhələ məmurun və ümumiyyətlə təbəənin determinizm üzərində qurulan əvəz prinsipinin mühüm siyasi əhəmiyyət kəsb etməyə başladığı bir dövr idi. Lakin əvəz prinsipi yalnız cinayət və cəza arasındakı münasibətlərə birmənalı qanun statusunun verilməsi ilə tamamlanmır. Cinayət və cəza arasındakı münasibətlərə birmənalı qanun statusunun verilməsi əvəz prinsipinin yalnız bir tərəfidir. Onun ikinci tərəfi isə birmənalı qanun statusunun xidmət və haqq arasındakı münasibətlərə verilməsi ilə bağlıdır.
Məmurun və ya ümumiyyətlə təbəənin statusunu və öhdəliklərini reqlamentasiya edən əksər qanunlarda xidmət və haqq arasındakı münasibətlər birmənalılaşdırılır, məmurun və ya təbəənin təkcə nə etməli olduğu deyil, həm də bunun əvəzində necə mükafatlandırılacağı da diqqətə çatdırılır, onun nə etməli olduğunun aşkar surətdə göstərilməsi bunun əvəzində nə alacağının göstərilməsi ilə tamamlanır, həmişə aşkar formada olmasa da, ən azı qeyri-aşkar formada.
Beləliklə, qanun bir qədər sadələşdirilmiş şəkildə deyilərsə, müəyyən mənada vəzifə təlimatı ilə ştat cədvəlinin özünəməxsus bir sintezi kimi təsəvvür edilə bilər. Əgər qanun vəzifə təlimatının bir proobrazı olaraq vəzifə sahibləri tərəfindən yerinə yetirməli olan xidməti öhdəliklərin təsvirini özündə ehtiva edirsə, ştat cədvəlinin bir proobrazı olaraq hakimiyyət orqanının bir təsisat kimi strukturunun, vəzifələrin adlarının, sayının fiksasiyası ilə yanaşı həm də eyni zamanda əməkhaqqının miqdarının göstərilməsi ilə səciyyəvidir.
Daha anlaşıqlı olmaq üçün bir qədər kobud terminlərdən bir daha istifadə etsək, onda təsdiq edə bilərik ki, qanun o şəraitdə meydana gəlir ki, təbəə kütləsi kölə sistemi olmaqdan nökər sistemi olmağa doğru təkamül edir. Belə ki, kölə öz sahibinə təmənnasız xidmət edir, nökər isə xidmətinin əvəzində haqq alır. Kölə məhz kölə olduğu üçün xidmət edir, nökər isə xidmətini haqq aldıqdan ötrü göstərir. Qanun ilk növbədə əslində həmin bu nökər instinktinin sanksiyalaşdırılması ilə meydana çıxır. Təbəə kütləsinin kölə sistemi olmaqdan nökər sistemi olmağa doğru təkamülü isə tiraniyanın son, böhran mərhələsində baş verir.
Bu mərhələdə hökmdarın özünün siyasi və hüquqi instinktlərinə qaldıqda isə, bunlar, cəngavərin siyasi və hüquqi instinktləri ilə təbəənin siyasi və hüquqi instinktləri arasında aralıq mövqe tutur. Xatırladaq ki, təbəənin əvəz prinsipinin mütləqləşdirilməsində öz rasional ifadəsini tapan siyasi və hüquqi instinktlərindən fərqli olaraq, cəngavərin siyasi və hüquqi instinktləri öz rasional ifadəsini tale ideyasında tapır. Təbəə isə xidmət və mükafat arasında və həmçinin cinayət və cəza arasında birmənalı münasibətlər sistemini son dərəcə qiymətləndirdiyindən, dövlətin idarə olunmasının özülünü də hələ ki qanunun aliliyi prinsipi adlandırılmasa da1, qanunun icrasının zəruriliyi prinsipi adlandırıla bilən prinsipdə görür.
Qanunun icrasının zəruriliyinin qarantı olaraq isə tarixən ilkin olaraq monarx çıxış edir. Belə ki, qanun-məşvərətçi orqan tərəfindən işlənilib hazırlanan və müzakirə edilərək təsdiq olunmaq üçün monarxa təqdim edilən hər bir qanun layihəsi yalnız monarx tərəfindən təsdiq olunduqdan, yəni monarxın rasional iradəsinin ifadəçisinə çevrildikdən sonra hüquqi qüvvə kəsb edir və onun icrası yalnız bu halda ictimai-siyasi zərurətə çevrilir.
Hökmdar monarx statusunu kəsb edərkən demək olar ki eyni tarixi zamanda həm vəzifə, post, siyasi status təsisçisi, həm təyinatçısı, həm qanun yaradıcısı olur və həm də qanunverici hakimiyyətin də başçısı olmuş olur, bunlardan birinci, üçüncü və dördüncü hallarda əlbəttə ki vəzirin və ümumiyyətlə qanun-məşvərətçi orqanın aktiv fəaliyyəti və dəstəyi ilə.
Monarxın tirandan fərqi həm də bu baxımdan özünü göstərir. Əgər tiran məiyyətin sahibidirsə, monarx məmurun hər şeydən öncə ya bilavasitə, ya da bilvasitə qanunvericisidir.
Əgər tiran və məiyyət arasındakı münasibətlər rəis və tabedə olan arasındakı münasibətləri xatırladırsa, monarx və məmur arasındakı münasibətlər daha çox dramaturq və aktyor arasındakı münasibətləri xatırladır. Monarx qanun yaradıcısı olmaqla bir dram əsəri müəllifinə, vəzifə təyinatçısı olmaqla isə dram əsərini səhnəyə qoyan rejissora bənzəyir. Qanunun özü də sanki bir dram əsəridir ki, burada personajların yerini məmurlar tutur. Aktyor özünü yalnız əsərdə göstərilən qaydada aparmalı olduğu kimi, məmur da özünü yalnız qanunda göstərilən qaydada aparmalıdır. Aktyor əsərdə yer alan rollar içərisindən yalnız rejissor tərəfindən ona verilən rolu oynamalı olduğu kimi, məmur da qanunda yer alan vəzifələr içərisindən yalnız monarx tərəfindən təyin edildiyi vəzifəni icra etməlidir. Heç də təsadüfi deyildir ki, tiraniya dövrü cəmiyyət həyatının ümumən canlanması ilə yanaşı həm də poeziyanın gur inkişafı ilə səciyyəvi olduğu halda, monarxiya dövrü dövlətə xidmətin artıq yalnız canlı tabeçilik qaydasında deyil, eyni zamanda təsisatlar və təyinatlar qaydası ilə aparılması ilə yanaşı həm də cəmiyyətin ümumi həyatında dramaturgiyanın gur inkişafı ilə səciyyəvidir.
İndi isə mənə elə gəlir yaxşı olardı ki, monarxiyanın və tiraniyanın müqayisəli təhlilinə bir daha, sonuncu dəfə qayıdaq və bu təhlili artıq başa çatdıraq, siyasi təkamül prosesində hökmdarın tiran statusundan monarx statusuna keçid almasının təhlilini tamamlayaraq, diqqətimizi müstəsna olaraq monarx statusunun öz xalisliyində tarixi inkişafına yönəltməyin zamanı düşünürəm ki, artıq yetişmişdir.
Beləliklə, sonuncu müqayisə. Əgər tiraniyada dövlət canlı orqanizmi xatırladırsa, monarxiyada o, daha çox insan tərəfindən yaradılan süni mexanizmi, cansız maşını xatırladır. Əgər məiyyət tiranın canlı iradəsinin alətidirsə, məmur daha çox cansız dövlət maşınının alətidir.
Monarxiya yalnız o ölçüdə zəruridir ki, hökmdar dövlət qarşısında duran həqiqi problemləri görməklə və başlıca siyasi vəzifələri həm siyasi məqsəd olaraq, həm də siyasi status olaraq müəyyənləşdirməklə yanaşı, eyni zamanda, bir tərəfdən, bu problemlərin uğurlu həlli üçün, bu ümumsiyasi məqsədlərin müvəffəqiyyətlə yerinə yetirilməsi üçün, vəzifə təsisatlarının və təyinatlarının uğurla gerçəkləşdirilməsi üçün bir vasitə olaraq yaradılan cansız dövlət maşınının institusional inkişafını öz kreativ nəzarəti altında saxlayır, obrazlı deyilərsə, bu cansız dövlət maşınının canlı ixtiraçısı və səmərələşdiricisi olur, onun strukturunu və fəaliyyət prinsiplərini daimi olaraq inkişaf etdirir, dövləti problemlərin həlli üçün onu müntəzəm olaraq yararlı vəziyyətə gətirir və yararlı vəziyyətdə saxlayır, yəni hüquqi bazanın, qanunların yaradılmasına aktiv və real rəhbərlik etməkdə davam edir, bu bazanı yeniləmək və siyasi gerçəkliyi mütəmadi olaraq həmin bazaya uyğunlaşdırmaq yolu ilə islahatlar həyata keçirir, digər tərəfdən isə uğurlu kadr siyasəti aparır, yenə də obrazlı deyilərsə, bu cansız maşının başlıca istehlakçısı olmaqla lazım gəldikcə onun artıq yararsız hala düşmüş hissələrini müntəzəm olaraq təzələri ilə dəyişir.
Monarxik sistemin xüsusiyyətlərindən biri də ondadır ki, hökmdar kadr siyasətini həyata keçirərkən idarəetməyə müstəsna olaraq irsi aristokratiyanı cəlb etməklə kifayətlənə bilmir. Bəzən cansız dövlət maşınının yararsız hala düşmüş hissələri məhz zadəgan mənşəlilərin içərisindən irəli çəkilənlər olur və onları əvəz etməli olan yenilərinin isə bəzən rəiyyət içərisindən seçilməsi lazım gəlir və bu, bir sıra hallarda təsadüfdən daha çox, zərurətdir. Belə ki, hökmdarın özü zadəgan mənşəli olsa da, o, həm də təbəə işinin də xüsusiyyətlərini bilməlidir ki, bu işin idarə olunmasının uğurla yerinə yetirilməsi üçün, uyğun vəzifələrin təsis edilməsinə və onların hüquqi bazasının yaradılmasına rəhbərlik edə bilsin, müvafiq təyinatları həyata keçirə bilsin, təbəə işi ilə bağlı vəzifələrin icrasını təbəələrin ən uyğun gələnlərinə həvalə edə bilsin. Bunun zadəgan mənşəli insan üçün çətin olması, tam həcmdə isə ümumiyyətlə mümkün olmaması ucbatından dövlətin idarə olunmasına artıq yalnız zadəgan mənşəli insanlar deyil, həm də yarızadəgan-yarırəiyyət mənşəli, hətta rəiyyət mənşəli insanlar da cəlb edilməyə başlayır, idarəetmə işi yalnız irsi olaraq zadəgan olanlara deyil, bu işi daha yaxşı bacaranlara həvalə edilir, onların sosial mənşəyi isə artıq müəyyənedici amil olaraq qəbul edilməməyə başlayır.
Dövlətin idarə olunmasına irsi olaraq zadəgan olanlarla yanaşı cəlb edilən həmin insanlar isə sonradan, tədricən xalis zadəganları dövlətin idarə olunmasından hətta sığışdırmağa da üz tuturlar və buna bəzən nail də olurlar.
Dövlətin idarə olunmasına həmin insanların cəlb edilməsi irsi aristokratiyanın intellektual imkanlarının fərqli olması ilə və bu səbəbdən də real siyasi-tarixi situasiyaya tam həcmdə müvafiq gəlməməsi ilə bağlıdır. İdarəetməyə cəlb olunanların içərisində əksəriyyəti təşkil edənlər isə yarızadəgan-yarırəiyyət mənşəlilər olur.
Dövlətin idarə olunmasında səlahiyyət əldə etmiş yarızadəgan-yarırəiyyət mənşəli insanın vəziyyəti isə ikimənalıdır, o, ədalətliliklə faydalılıq arasında tərəddüd keçirir. Ədaləti faydalılığa qurban verdikcə isə tədricən ürəyinin ilahi səsini korşaldır, faydalı olanın müdafiəsinə durduqca isə obrazlı deyilərsə içərisindəki iblisi canlandırır, zadəgan təbiətinə yadlaşır, haqqa və ədalətə həqarətlə baxır, sözün pis mənasında rasional iradənin daşıyıcısı olur, və yenə də sözün pis mənasında məiyyət olur. Ona görə sözün pis mənasında rasional iradənin daşıyıcısı olur ki, onun rasional iradəsi dövlətin bir sosial orqanizm olaraq üzvi iradəsi ilə üst-üstə düşmür və ona görə sözün pis mənasında məiyyət olur ki, onun fəaliyyət ahəngi xidmətində durduğu dövlətin fəaliyyət ahəngi ilə uyuşmur. Çünki o, əslində dövlətin xidmətində olmur, özünü dövlətə xidmət edən kimi göstərir və bundan faydalanır. Məiyyətin ümumiyyətlə dövlətə göstərdiyi xidmətin lazımi səviyyədə olmaması son nəticədə əlbəttə ki dövlətin özünü və özülünü zəiflədir və bu səbəbdən də dövlət xidmətə görə haqqı da lazımi səviyyədə verə bilmir və vermir. Məiyyətin bir hissəsi özünün mövcud durumu ilə razılaşaraq xidmətini sədaqətlə davam etdirir, ikinci hissəsi digər gəlir mənbələrini də axtarıb-tapmağa çalışır, üçüncü hissəsi isə digər gəlir mənbələrini axtarıb-tapır və xidməti tərk edir.
Beləliklə, dövlətin institusional inkişafı öz müəyyənliyini və birmənalılığını müəyyən dərəcədə itirmiş olur və monarx tərəfindən təyinatların verilməsi də mürəkkəbləşir.
Bu şəraitdə himayə prinsipi hakimiyyət prinsipi qarşısında getdikcə daha çox geri çəkilməyə başlayır, himayə öz prinsipial mövqeyini hakimiyyətə verir.
Amma indi himayə üçün digər bir sfera - şəhərin hakimiyyət tərəfindən artıq bir o qədər də gərəkli hesab edilməyən və buna görə də rəsmi hakimiyyət tərəfindən artıq bir o qədər himayə də olunmayan, rəsmi hakimiyyətlə özü arasındakı subordinasiya münasibətlərini rəsmən itirən rəiyyət kütləsi ilə rəsmi hakimiyyətin ayrı-ayrı nümayəndələri arasında qeyri-rəsmi himayə münasibətləri formalaşır, başqa sözlə, korrupsiyanın əsası qoyulur. Digər tərəfdən özü üzərində rəsmi hakimiyyətin himayəsini əslində itirən həmin o şəhərli kütləsi ilə dövlət hakimiyyətindən kənarda qalan zadəgan mənşəli insanlar arasında yeni bir himayə münasibətləri meydana çıxır, və məhz bu sferada vətəndaş cəmiyyətinin ilk cücərtiləri formalaşır. Hakimiyyətdən qopub ayrılan şəhərli kütləsinin artıq vətəndaş cəmiyyəti olaraq formalaşması əsasən bu kütlənin təşkilatlanmağa başlaması ilə ifadə olunur və monarxiyanın bir siyasi sistem olaraq böhran vəziyyəti keçirdiyi dövrün yaxınlaşmasına doğru həmin təşkilatlanma siyasi xarakter daşımağa və nəticədə hakimiyyətə iddialı olan insanların siyasi partiya adlandırılan birliyi yaranır.
Beləliklə, şəhər mədəniyyətinin zadəgan mədəniyyəti ilə təması nəticəsində şəhər mədəniyyəti burjualaşmağa doğru üz qoyur. Bununla da zadəgan dünyagörüşü şəhərli dünyagörüşündən prinsipial əlamətlərlə fərqlənsə də, şəhərli kütləsinin tarixi təkamülündə zadəgan mənşəli insanlar da artıq müəyyən, bəlkə də mühüm rol oynamağa başlayırlar.
Digər tərəfdən, dövlət hakimiyyətindən kənarda qalan zadəgan mənşəli insanlar şəhərin himayəçisi olmağa başladıqları zamandan şəhər özlüyündə mühüm siyasi əhəmiyyət kəsb edir və bunun da nəticəsində şəhər əhalisinin getdikcə daha çox bir hissəsi monarxın real hakimiyyətindən kənarda qalır.
Belə olduqda monarxiyanın bir siyasi sistem olaraq böhranı başlayır, dövlət maşını laxlamağa doğru gedir və dövləti problemlərin həlli getdikcə daha çox ləngiyir. Əgər bu ləngimənin başlıca mənbələrindən biri hökmdar təfəkkürünün siyasi problemləri həll edə bilən düzgün qərarları vermək üçün zəruri informasiya ilə yüklənməməsidirsə, digər mənbə hökmdar təfəkkürünün izafi informasiya ilə, yəni mövcud siyasi problemlərin bilavasitə həllinə yönəlməyən informasiya ilə yüklənməməsidir. Hökmdar təfəkkürünün ümumdövlət problemlərinin deyil, xüsusi problemlərin, daha dəqiq deyilərsə, onu bir monarx kimi deyil, bir fərd kimi qayğılandıran problemlərin həllinə yönəlməsi hökmdar təfəkkürünün deqradasiyasına gətirib çıxarır.
Dövlət maşınının laxlamağa doğru yönəlməsinin və dövləti problemlərin həllinin getdikcə daha çox ləngiməsinin ən başlıca mənbəyi isə hökmdar təfəkkürünün korşalmasıdır və bu səbəbdən də siyasi problemləri həll edə bilən düzgün qərarları verə bilməməsidir.
Monarx özünün təbəə üzərindəki real hakimiyyətini yuxarıda göstərilən səbəblər ucbatından getdikcə daha çox itirməsinin qarşısını almaq üçün, təbəə kütləsi üzərində öz nəzarətini möhkəmləndirmək və idarəetmənin keyfiyyətini artırmaq məqsədi ilə idarəetmənin həyata keçirilməsində ona yardımçı ola biləcək bir təsisat kimi üzvləri irsi aristokratiyanın seçmə nümayəndələrindən ibarət Dövlət Şurasını yaradır və özü ilə məmur kütləsi arasında əlaqələndirici həlqə kimi həmin bu Dövlət Şurasını yerləşdirir. Öncə mövcud olan qanun-məşvərətçi orqanın səlahiyyətləri də Dövlət Şurasına verilir.
Monarx Dövlət Şurasını irsi aristokratiyanın ona idarəetmə işində, xüsusən də qanun yaradıcılığı işində yardımçı olması üçün yaradır. Bununla da hökmdar idarəetmədə onun bilavasitə hökmü altında olan, onu əhatə edən, lakin gücünə və sədaqətinə artıq bir o qədər də etibar etmədiyi məiyyət kütləsindən müəyyən qədər üz döndərərək üzünü irsi aristokratiyaya doğru çevirir, özü ilə müəyyən mənada və müəyyən dərəcədə eynimənşəli, eyniköklü, həmkar hesab edilə bilən irsi aristokratiyaya doğru. Hökmdar bununla da öz hakimiyyətinin bir hissəsini də əslində irsi aristokratiyaya güzəştə getmiş olur.
Amma bu hal başlanğıc məqamında hökmdarın siyasi çəkisini və populyarlığını azaltmır, əksinə artırır. Siyasi çəkisi və populyarlığı bu halda azalan isə vəzir olur. Vəzirin müəyyənedici rol oynadığı qanun-məşvərətçi orqanın öz mövqeyini Dövlət Şurasına verməsi ilə vəzirin idarəetmədə malik olduğu status itirilməsə də, kifayət dərəcədə zəifləyir.
Dövlət Şurası hökmdarın məsləhət almaq istəyindən yaranır və öncə məşvərətçi orqan kimi təsis edilir. Məmur kütləsinin davranış prinsiplərini özündə ehtiva edən qanunların hökmdar tərəfindən təsdiqindən öncə Dövlət Şurasında müzakirəsi nəzərdə tutulur. Qanunvericilik təşəbbüsü əvvəlcə hökmdara, sonra isə Dövlət Şurasının digər üzvlərinə məxsus olur.
Sonradan Dövlət Şurası tədricən məşvərətçi orqandan qanunverici orqana doğru təkamül edir.
Dövlət Şurasının əhəmiyyəti həddindən artıq artdığı halda isə hökmdar əslində hökmdar olmaqdan qalaraq, Dövlət Şurasının sadəcə olaraq üzvlərindən birinə çevrilir. Dövlət Şurası bu halda, Hobbsun dili ilə deyilərsə, suveren statusunu kəsb edir.
Belə olduqda, monarxiyanın tək adamın hakimiyyəti mənasında bir siyasi sistem olaraq yeni böhranı baş vermiş olur, daha doğrusu, monarxiyanın tək adamın hakimiyyəti mənasında böhranı özünün ikinci mərhələsinə qədəm qoyur. Monarxiya bu halda özünün əzəli mənasını, tək adamın hakimiyyəti mənasını ona görə itirmiş olur ki, onun adı monarxiya olaraq qalsa da, özü əslində monarxiya, yəni tək adamın hakimiyyəti olmur.
Burada o faktı da xatırlatmağa dəyər ki, Makiavelli tərəfindən irəli sürülən və bu günə qədər də təqdir olunan təkhakimiyyətlilik-respublika qarşıqoyulması dəqiq deyildir və heç cür mütləqləşdirilə bilməz. Nominal olaraq monarxiya adlandırılan bəzi dövlətlər əslində respublika xarakterli olduqları kimi, nominal olaraq respublika adlandırılan bəzi dövlətlər də əslində monarxik təbiətlidir.
Qayıdaq Dövlət Şurasının suveren statusunu kəsb etməsi ilə bağlı siyasi gedişatın təhlilinə.
Siyasi təkamülün sonrakı gedişatında hökmdar Dövlət Şurasının suveren statusunu təsdiq etməklə öz təkhakimiyyətliliyinin nominal xarakterini qanuniləşdirir. Bu hal hüquqi müstəvidə öz ifadəsini kooptasiya prinsipinin rəsmən tanınmasında, xüsusən də onun hökmdar tərəfindən rəsmən tanınmasında tapır. Əgər məşvərətçi statuslu Dövlət Şurasının üzvləri hökmdar tərəfindən təyin edilirlərsə, suveren statuslu Dövlət Şurası öz tərkibini kooptasiya yolu ilə, özünün qərarı ilə müəyyənləşdirir. Bu müəyyənləşdirmə öz məntiqi sonluğunu isə onda tapır ki, Dövlət Şurasının üzvləri əsasən əyalətlərin əmirlərindən ibarət olur, Dövlət Şurası müəyyən qədər aristokratik senatı bərpa edir.
Əgər suveren statuslu Dövlət Şurası dövlətin problemlərini həll edə biləcək qərarları vermə qüdrətinə malikdirsə, dövlət yenidən qədim yunanların başa düşdüyü mənada aristokratiya və ya müasir siyasi terminologiya nöqteyi-nəzərindən meritokratiya1 xarakterini alır. Meritokratiya, və ya dövlət forması mənasında başa düşülən aristokratiya cəngavər mədəniyyəti əsasında formalaşır və ondan törəyir. Suveren statusunun monarxdan Dövlət Şurasına keçməsi ilə ifadə olunmuş tarixi akt uyğun cəngavər mədəniyyətini siyasiləşdirir və bununla da zadəgan mədəniyyətinin hüdudlarını genişləndirir.
Aristokratiyanın bir dövlət forması kimi siyasi gerçəklikdə yenidən yer almasının tarixi hədləri əhəmiyyətli dərəcədə uyğun cəngavər mədəniyyətinin intellektual imkanları ilə müəyyənləşir. Bu imkanlar xaricində aristokratiyanın özü də deqradasiyaya uğramağa başlayır. Dövlət Şurası belə halda öz siyasi əhəmiyyətini azaldır və suveren statusunu tədricən itirməyə doğru üz tutur. Dövlət Şurasının siyasi əhəmiyyətinin azalmasının və onun suveren statusunun tədricən itirilməyə doğru üz tutmasının səbəbi isə irsi aristokratiyanın intellektual imkanlarının tükənməsi ilə bağlıdır.
Aristokratiyanın yaradıcılıq imkanlarının tükənməsi zadəgan və şəhər mədəniyyətləri arasında bir daha yadlaşmaya, nəticədə dövlətin bir daha praqmatikləşdirilməsinə, aristokratizmin isə bir daha sığışdırılmasına gətirib çıxarır.
Çünki irsi aristokratiyanın siyasi yaradıcılıq qüdrətinin təkamül tempi siyasi problemlərin təkamül tempindən geri qaldıqca, siyasi problemlərin Senat institutunun dirçəldilməsi vasitəsilə aristokratik zəmində tam həlli mümkün olmur. Əksinə olaraq aristokratik senatın dirçəldilməsi öz ifadəsini həm də hakimiyyətin irsi aristokratiya ilə bölüşdürülməsində tapır ki, bu da nəticədə ayrı-ayrı əyalət rəhbərlərinin müstəqilliyini artırır, separatizmi gücləndirir.
Əgər hökmdar tərəfindən şəhərin dəstəklənməsi, himayə olunması və deməli ki, həm də gücləndirilməsi şəhəri bütövlükdə hökmdarın hakimiyyəti üçün təhlükəyə çevirirdisə, irsi aristokratiyanın dəstəklənməsi hökmdar üçün ərazi bütövlüyünün pozulması təhlükəsini yaradır.
Belə bir şəraitdə dövlətin inkişafı ən azı üç istiqamətdə baş verə bilir. Birinci istiqamət - şəhərin iqtisadi və siyasi inkişafı üzərində nüfuz qazanmış zadəgan mənşəlilərin şəhəri üsyana qaldırmasıdır. İkinci istiqamət – ümumən dövlətdə kifayət qədər siyasi kapital toplamış əyalət əmirlərdən birinin hakimiyyəti dövlət çevrilişi vasitəsilə ələ keçirməsidir. Üçüncü istiqamət isə dövlət qarşısında duran problemlərin həllinin mürəkkəbləşməsi ilə bağlı dövlətin idarə olunmasının da mürəkkəbləşdirilməli olduğu əqidəsindən çıxış edilərək, monarx tərəfindən kardinal siyasi islahatların həyata keçirilməsidir, bu siyasi islahatlara əlbəttə ki, ilk növbədə Dövlət Şurasının əldə etdiyi suveren statusunun ləğv edilməsi aiddir.
Əgər şəhər iqtisadi və siyasi baxımdan kifayət qədər inkişaf etmişsə, dövlət düşdüyü böhranlı vəziyyətdən birinci istiqamətə üstünlük verərək çıxır. Belə olmadıqda, əgər monarx bir şəxsiyyət olaraq öz siyasi nüfuzunu itirmişsə dövlət ikinci istiqamət üzrə, əgər itirməmişsə üçüncü istiqamət üzrə inkişaf edəcəkdir.
Dövlətin ikinci və ya üçüncü istiqamət üzrə öz təbii inkişafını davam etdirdiyi halda isə, hökmdar həm öz siyasi çəkisini və qüdrətini getdikcə artırmaqda olan şəhər üzərində hakimiyyətini möhkəmlətmək üçün, həm əyalət rəhbərlərinin separatizminin qarşısını almaq üçün, həm də bir çox nümayəndələri dövlət aparatında əhəmiyyətli yer alan, populyarlığı, siyasi çəkisi və sayı kifayət dərəcədə artmış məmur kütləsini özünün real nəzarətində saxlaya bilmək üçün və onun bir bütöv olaraq daimi mütəhərrikliyinə və səmərəli fəaliyyətinə nail olmaq üçün bu kütləni ayrı-ayrı hissələrə bölür və həmin hissələr üzərində nəzarəti yeni siyasi təsisatların daşıyıcılarına - «
Dostları ilə paylaş: |