Dağınıq skleroz xəstəliyinə tutulmuş şəxslərə dövlət qayğısı
barədə qanunvericilik aktlarına dair
BƏLƏDÇİ QAYDALAR
7 mart 2012-ci il tarixdə “Dağınıq skleroz xəstəliyinə tutulmuş
şəxslərə dövlət qayğısı haqqında” Azərbaycan Respublikasının
Qanunu imzalanmışdır.
Bu Qanun Azərbaycan Respublikası Konstitusiyasının 94-cü
maddəsinin I hissəsinin 1-ci bəndinə uyğun olaraq dağınıq skleroz
xəstəliyinə tutulmuş şəxslərə dövlət qayğısının təşkilati-hüquqi
əsaslarını müəyyən edir, bu xəstəliyin profilaktikası və müalicəsi
sahəsində yaranan münasibətləri tənzimləyir.
Qanuna uyğun olaraq dağınıq skleroz xəstəliyinə tutulmuş
şəxslərin tibbi göstərişlər əsasında ambulator, stasionar və ya
sanatoriya-kurort şəraitində tibbi yardım almaq, siyahısı müvafiq icra
hakimiyyəti orqanı (Azərbaycan Respublikasının Nazirlər Kabineti)
tərəfindən müəyyən edilmiş yüksək effektli inyeksiya vasitələri və
digər dərman preparatları ilə təmin olunmaq, müayinə və müalicə
üçün zəruri müddətdə stasionarda qalmaq, psixoloji yardım almaq,
sağlamlığının vəziyyəti, xəstəliyin mahiyyəti, tətbiq olunan müalicə
üsulları, aparılmış müalicənin nəticələri haqqında ətraflı və
müntəzəm məlumat almaq, ailənin planlaşdırılması məsələlərinə və
ailə-nikah münasibətlərinin tibbi-psixoloji cəhətlərinə dair dövlət və
bələdiyyə tibb müəssisələrində pulsuz məsləhətlər almaq,
müayinədən keçmək və dispanser nəzarətində olmaq, Azərbaycan
Respublikasının əmək qanunvericiliyi ilə müəyyən edilən işçinin
səhhətinə, sağlamlığına mənfi təsir göstərən amillər olan ağır, zərərli
və təhlükəli əmək şəraitli peşələr (vəzifələr) və iş yerləri istisna
olmaqla, istənilən iş yerlərində işləmək, pozulmuş hüquqları barədə
qanunla müəyyən edilmiş qaydada müvafiq orqanlara və ya
məhkəməyə müraciət etmək hüquqları vardır. Şəxsin dağınıq skleroz
xəstə olması səbəbinə görə əmək müqaviləsinin bağlanmasından
imtina etmək və ya əmək müqaviləsinə xitam vermək (işəgötürənin
müvafiq işi (vəzifəsi) olmadığı, habelə belə şəxslərin əməyindən
istifadə olunmasına yol verilməyən iş yerlərinə işə götürməkdən
imtina olunan hallar istisna olmaqla) yolverilməzdir. Dağınıq skleroz
xəstəliyinə tutulmuş şəxslərə əlillik və ya sağlamlıq imkanlarının
59
məhdudluğu qanunla müəyyən edilmiş qaydada təyin edilir. Dağınıq
skleroz xəstəliyinə tutulmuş 18 yaşına çatanadək sağlamlıq
imkanlarının məhdudluğu müəyyən olunmuş 18 yaşından yuxarı
şəxslərə əlillik müddətsiz təyin edilir.
9 aprel 2012-ci il tarixdə “Dağınıq skleroz xəstəliyinə tutulmuş
şəxslərə dövlət qayğısı haqqında” Azərbaycan Respublikasının
Qanununun tətbiqi barədə Azərbaycan Respublikası Prezidentinin
Fərmanı imzalanmışdır.
Bu Fərmanla Azərbaycan Respublikasının Nazirlər Kabinetinə
“Dağınıq skleroz xəstəliyinin müalicəsi, profilaktikası və onunla
mübarizə tədbirlərinə dair Dövlət Proqramı”nın layihəsinin
hazırlanıb Azərbaycan Respublikasının Prezidentinə təqdim
edilməsi, dağınıq skleroz xəstəliyinə tutulmuş şəxslərin dövlət tibb
müəssisələrində müayinə və müalicəsinin maliyyələşdirilməsi
qaydasının, onlara göstərilməli olan tibbi yardımın həcminin və
keyfiyyət standartlarının Azərbaycan Respublikasının Prezidenti ilə
razılaşdırmaqla müəyyən edilməsi, göstərilən illik tibbi yardımın (o
cümlədən zəruri olan müayinələrin) həcminin, inyeksiya vasitələrinin
və digər dərman preparatlarının siyahısının və miqdarının, habelə bu
preparat və vasitələrlə təminat qaydasının müəyyən edilməsi və bu
barədə Azərbaycan Respublikasının Prezidentinə məlumat verilməsi,
onların sanatoriya-kurort müalicəsi ilə təmin edilməsi qaydasının
müəyyən edilməsi və bu barədə Azərbaycan Respublikasının
Prezidentinə məlumat verilməsi tapşırılmışdır.
Azərbaycan Respublikası Nazirlər Kabinetinin 211 nömrəli
25 sentyabr 2012-ci il tarixli Qərarı ilə “Dağınıq skleroz xəstəliyinə
tutulmuş şəxslərə göstərilən illik tibbi yardımın (o cümlədən zəruri
olan müayinələrin) həcmi, inyeksiya vasitələrinin və digər dərman
preparatlarının siyahısı və miqdarı”, “Dağınıq skleroz xəstəliyinə
tutulmuş şəxslərin inyeksiya vasitələri və digər dərman preparatları
ilə təminat Qaydası”, “Dağınıq skleroz xəstəliyinə tutulmuş şəxslərin
sanatoriya-kurort müalicəsi ilə təmin edilməsi Qaydası” və “Dağınıq
skleroz xəstəliyinin müalicəsində istifadə olunan yüksək effektli
inyeksiya vasitələrinin və digər dərman preparatlarının Siyahısı”, 278
nömrəli 5 dekabr 2012-ci il tarixli Qərarı ilə “Dağınıq skleroz
xəstəliyinə tutulmuş şəxslərin dövlət tibb müəssisələrində müayinə
və müalicəsinin maliyyələşdirilməsi Qaydası” və “Dağınıq skleroz
60
xəstəliyinə tutulmuş şəxslərə göstərilməli olan tibbi yardımın həcmi
və keyfiyyət standartları” təsdiq edilmişdir.
13 noyabr 2012-ci il tarixdə “Dağınıq skleroz xəstəliyinin
müalicəsi, profilaktikası və onunla mübarizə tədbirlərinə dair Dövlət
Proqramı”nın təsdiq edilməsi haqqında Azərbaycan Respublikası
Prezidentinin Sərəncamı imzalanmışdır. Dövlət Proqramında
Proqramın məqsədi, Proqramın maliyyələşdirilməsi, Proqram
çərçivəsində həyata keçirilməsi nəzərdə tutulan tədbirlər, Proqramın
həyata keçirilməsindən gözlənilən nəticələr öz əksini tapmışdır.
Proqram çərçivəsində “Tibb müəssisələrinin maddi-texniki bazasının
gücləndirilməsi, “Dağınıq skleroz xəstəliyinin profilaktikası,
müalicəsi və reabilitasiyası”, “Kadr hazırlığı” və “Dağınıq skleroz
xəstəliyinə dair maarifləndirmə” kimi tədbirlərin həyata keçirilməsi
nəzərdə tutulmuşdur.
Azərbaycan Respublikası Səhiyyə Nazirliyinin 125 nömrəli
28 dekabr 2012-ci il tarixli əmri ilə “Dağınıq skleroz xəstəliyinin
müalicəsi, profilaktikası və onunla mübarizə tədbirlərinə dair Dövlət
Proqramı”nın icrası üçün Azərbaycan Respublikası Səhiyyə
Nazirliyinin Tədbirlər Planı təsdiq edilmişdir.
|