Professor
İyirmi beş il bundan əvvəlin söhbətidir. Jurnalistika fakültəsinin tələbəsi
kimi «Bakı» axşam qəzetində istehsalat təcrübəsi keçirdik.. Tələbə yoldaşlarımdan
biri qabaqcıl peşə sahibi haqqında ürəklə, həvəslə yazdığı oçerki redaksiyaya
təqdim etmişdi. Bir gün «Bakı» axşam qəzetinin redaktoru Nəsir İmanquliyev ( o
həm də universitetdə bizə dərs deyirdi) onu otağına dəvət etmiş və birbaşa mətləbə
keçmişdi:
- Oçerki yaxşı yazmısan. Qələmin pis deyil. Amma, oçerkdən daha çox yaxşı
sözlər lüğətinə oxşayır. Dilimizin fondunda nə qədər dürlü, nə qədər gözəl sözlər
var hamısı ilə qəhrəmanı bəzəmisən. Özü də o adam istehsalat göstəricilərinə görə
digərlərindən elə də fərqlənmir.
Ordeni yox, medalı yox. Tutaq ki, bir müddət sonra sənin qəhrəmanına fəxri
ad verdilər. Bəs o vaxt sən ondan nə və necə yazacaqsan? Axı, bütün yaxşı sözləri
işlətmisən. Sözə hörmətlə yanaşmaq, onun qədrini bilmək lazımdır, - demiş və
oçerki qaytarıb əlavə etmişdi:
-
Dediklərimi nəzərə al, yenidən işlə, şənbə nömrəsinə çatdır. Tələbə
yoldaşım elə də etmişdi. Tələbə yoldaşım «Od-alov püskürən» oçerki bir qədər
«soyuyaraq» yenidən oxumuş və redaktorun nə qədər haqlı olduğunu hiss
etmişdi. Bu hadisəni təsadüfən xatırlamadım.
Bəzən müəlliflər nəyin xatirinəsə bəhs etdikləri adamı xidmətlərinə görə yox,
şəxsi münasibət və mülahizələrinə əsasən ölçü, əndazə, hədd bilmədən tərifləyir,
mədh edirlər. Bu məqamda mərhum Nəsir İmanquliyev kimi müəllim və
redaktorun yeri görünür ki, desin «dayan, belə yazmaq olmaz»
Doğrudan da, kiminsə ünvanına sədd, sərhəd bilmədən tərif yağdıranda
əslində həmin sözlərə layiq olanların haqqına toxunursan. İndi elmi pedaqoji
fəaliyyətlə, başqa yaradıcılıq sahələri ilə bu və ya digər dərəcədə məşğul olanlar
haqqında çox yazılır, çox təriflər söylənilir. Məqalə müəlliflərinə, onların
qəhrəmanlarının uğurlarına kölgə salmadan haqqında danışdığım insanın əməli və
xidmətlərini xarakterizə etmək, fərqləndirmək üçün çox sanballı, çox hörmətli bir
sözü sərlövhəyə çıxarıram: «Professor». Sirr deyil ki, bəzən bu söz bu adı
236
daşıyanlara hörmət gətirir, onları şöhrətləndirir. Fikrimcə, söhbət Nizaməddin
Şəmsizadədən gedəndə belə də demək olar. «Professor» sözü Nizaməddin
Şəmsizadəyə nə qədər şan-şöhrət gətirirsə, onu tanıdırsa, Nizaməddin Şəmsizadə
adı və təxəllüsü də «professor» sözünə o qədər yaraşır, yaraşıq verir. Məncə
Nizaməddin Şəmsizadə qeyri-adi müşahidə qabiliyyəti, problemi görmək və onun
mahiyyətinə dərindən nüfuz etmək bacarığı, analoji fakt və hadisələri
qruplaşdırmaq müqayisə və təhlil etmək, ümumiləşdirmək, doğru – dürüst elmi
nəticələr çıxarmaq və nəhayət, qələmə almaq məharəti ilə seçilən alimlərdəndir.
Mərhum professor Xəlil Əlimirzəyev deyərdi ki, «Adam var, yaxşı
tədqiqatçıdır yaxşı da natiqdir. Amma, yaxşı yaza bilmir. Adam var, yaxşı
tədqiqatçıdır, yaxşı da yazır, amma pis danışır. Adam da var, həm yaxşı tədqiq
edir, həm yaxşı yazır, həm də yaxşı natiqdir, bax əsl alim odur». Xoşbəxtlikdən
hər üç keyfiyyət Nizaməddin Şəmsizadədə birləşmişdir.
1978-ci ildən Azərbaycan Elmlər Akademiyası Nizami adına Ədəbiyyat
İnstitutunda əmək fəaliyyətinə başladığı vaxtdan N.Şəmsizadə elmi – ədəbi
ictimaiyyətin diqqətini cəlb etmişdir. Mövzunu seçmək, ona yanaşmaq tərzi və
metodu ilə fərqlənən Nizaməddin ilk axtarışlarından ədəbiyyatşünaslıq sahəsinə
ciddi, iddialı və inadkar bir gəncin gəldiyini hiss etdirdi. Qısa bir müddətdə yazdığı
dissertasiya ilə repressiya qurbanı olmuş görkəmli tənqidçi Əli Nazimi ilk dəfə
tənqidi fikir tarixinə gətirmiş, onun rəsmi bəraətinə, əgər belə demək mümkünsə,
mənəvi bəraət möhürünü vurmuşdur.
Ədəbiyyatşünaslığın
20-30-cu illər repressiya dövründəki boşluğu
Nizaməddin Şəmsizadənin sanballı, nəzərə alsaq ki, həmin araşdırmalar sovet
rejimi və ideologiyasının hakimi – mütləq olduğu vaxtlarda aparılırdı, həm də
cəsarətli tədqiqatları ilə doldurulmuşdu. Müəllifin «Ədəbi mübahisələr» adlı
əsərində (1986) Azərbaycan ədəbi tənqidinin ziddiyyətli 1920-30-cu illər
mərhələsini ilk dəfə sistemli şəkildə təhlili verilmiş, B.Çobanzadə, Ə.Nazim,
M.Quliyev, Ə.Abid, H.Zeynallı, M.K. Ələkbər, A. Musaxanlı kimi xadimlərin elmi
– ədəbi irsini dəyərləndirilmişdi. N. Şəmsizadənin tədqiqatları müəllifin səmimiliyi
ilə daha da sanballı olur, o hər cür saxtakarlıqdan uzaqdır və lazım gəldikdə öz
mövqeyini məharətlə müdafiə edir. Əgər hansısa obyektiv yaxud, subyektiv
səbəbdənsə, tədqiqatçı mülahizə və mühakimələrində, qənaətlərində müəyyən
yanlışlıqlara yol verirsə, onu etiraf etməyi bacarır. Ulu Dədə Qorqud müdrikliyi və
kamilliyi ilə deyir: « Qoy bizim səhvlərimiz ibrət işığına çevrilib elimizə düz yolu
nişan versin» (Azərbaycan ədəbiyyatşünaslığı: mərhələlər və konsepsiyalar
kitabına müəllifin «On ildən sonra» adlı ön sözündən, səh. 4. Bakı, «Ozan» 1997).
Yeri gəlmişkən qeyd olunmalıdır ki, müəllifin 1986-cı ildə tamamladığı və 1997-ci
ildə oxucuların mühakiməsinə verdiyi «Azərbaycan ədəbiyyatşünaslığı: mərhələlər
və konsepsiyalar» kitabı ilə N.Şəmsizadə çalışdığı sahədə əbədi iz qoymuşdur:
Kitabın birinci fəslində ən qədim çağlardan – XX əsrin 40-cı illərinə qədərki bu
dövrün ədəbi – nəzəri fikrini təhlil süzgəcindən keçirmiş, onun mərhələ və
konsepsiyalarından bəhs etmiş və ən əsası isə ilk dəfə olaraq emprik, sinkretik,
analitik, bioqrafik və sosioloji adlarla təsnifatını aparmış, hər mərhələnin tarixi və
estetik sərhədlərini göstərmiş, xarakteristikasını vermiş, dəyərləndirmişdir.
237
Əsərin digər iki fəslində – Ədəbiyyat tarixçiliyi: nəzəriyyələr və konsepsiyalar
və «Ədəbiyyatşünaslığımızda söz sənəti konsepsiyası: poetika və sosiologiya»
hissələrində milli ədəbiyyat tarixinin formalaşması prosesi izlənir, söz sənətinin
poetika və sosiologiyası ilə bağlı təlimlər təhlil olunur, onlara münasibət bildirilir
və diqqət çəkən elmi nəzəri nəticələr çıxarılır. Maraqlı və həm də çox mənalıdır ki,
sovet dövründə qələmə alınan monoqrafiyanı çəkinmədən ortaya çıxaran müəllif
«gözlənilən tənqidlərdən, tənə və məzəmmətlərdən» qətiyyən narahat deyil, arzusu
budur ki, oxucu «buraxılan səhvi» və sovet dövründə yaşamağa və yazmağa
məhkum, məcbur olan «bizim nəsli dərindən dərk etsin». N.Şəmsizadə kitaba
yazdığı «On ildən sonra» adlı ön sözdə deyir: «Kitabı çapa təqdim edərkən onu
yenidən işləyə bilərdik. Fəqət, elmin akademizmini gündəlik ötərgi qərar və
şüarlara qurban verməyin milli faciələrə gətirdiyini bu gün aydın gördüyümüzdən
bu işi icra etmədik» (səh. 4).
O daha sonra göstərir ki, Səhvlərimizin ağrısını biz özümüz çəkməliyik, onu
gələcək nəsillərə miras qoymağa mənəvi haqqımız yoxdur. Çünki biz özümüzdən
əvvəlki nəsillərin əməlləri ilə bərabər səhvlərinə də sahib durmuşuq Həmin səhvlər
70-ci illərin sonunda fanatik bir həvəslə ədəbi tənqidə, elmə gəlmiş biz gənclərə
müqəddəs həqiqətlər kimi təqdim olunmuşdu. Bizə tarixin ən çətin aldanışlarla
dolu keşməkeşli, ən başlıcası isə taleyi qeyri – müəyyən bir dövründə yaşamaq
nəsib oldu. Biz dünyanın ən müdrik fəlsəfələrini, onun ağıllı yaradıcılarının «anti»
hesab edən marksizmin şikəstləri, totalitar rejimin övladlarıyıq (yenə orada. səh.
4).
Professor Nizaməddin Şəmsizadə ədəbiyyatşünaslıqda söz və nüfuz sahibidir.
O buna istedadı, bulaq kimi çağlayan enerjisi və çalışqanlığı ilə nail olmuşdur.
Ədəbiyyatşünaslıq meydanı geniş və bir qədər kobud desək, həm də sahibsizdir.
Burada kim necə istəsə, at oynada bilər. Sonra da «məncə belədir, mən belə
düşünürəm» yaxud N.Şəmsizadənin görkəmli tənqidçi adlandırdığı müsahiblərinin
birinin «Əşi, ədəbi proses çuval kimi bir şeydir, içərisinə nə gəldi doldurmaq olar»
deyib özünə haqq qazandırmaq mümkündür. Lakin, N.Şəmsizadənin öz yolu, öz
məramı, məsləki var. O ədəbiyyata «bəşərin özünə ucaltdığı ən böyük abidə»,
ədəbi tənqidin timsalında ədəbiyyatşünaslığa «nadir və mürəkkəb peşə» kimi baxır.
N.Şəmsizadə müraciət etdiyi əsərlərə tələsik və təsir altında, nəyinsə, yaxud
kiminsə, xatirinə münasibət bildirməkdən çox uzaqdır. Onun hər cür qərəzdən
uzaq, ləngərli və sanballı məqalələrini oxuyanda bu qənaətə gəlirsən:
- əsər çox diqqətlə mütaliə edilmişdir;
- yazının toxunduğu mövzunun milli və dünya ədəbiyyatında nə vaxt və necə
işlənib, işlənmədiyini, problemin aktuallığı dərindən araşdırılmış;
- əsərin dil, üslub, sənətkarlıq məsələləri, obrazlar onların özünəməxsusluğu
kamil sənət nümunələri ilə müqayisədə ciddi təhlil, yazıçının uğurları təqdir
edilmiş, nöqsanları göstərilmişdir.
Professor N.Şəmsizadə ədəbi-nəzəri fikir tariximizin problemlərini araşdırır,
tənqidin tənqidi ilə həm də tarixi ilə məşğul olur. Bu mənada onun 1985-ci ildə
qələmə aldığı və 2004-cü ildə nəşr etdiyi monumental «Tənqidin ədəbi prosesdə
rolu» kitabı xüsusilə diqqət çəkir. Həmin əsərin əlyazmasına rəy verən mərhum
Aydın Məmmədov N.Şəmsizadənin kitabını «zəngin və maraqlı tədqiqat əsəri»
238
adlandıraraq yazırdı: «Tənqidin ədəbi prosesdə rolu» kitabının mühüm və
əhəmiyyətli keyfiyyəti onun tənqidi tonda, yüksək tənqid pafosu və fəal üslubda
yazılmasıdır. Müəllif tənqidin mövqeyinə və ədəbiyyatın inkişafına mane olan fakt
və hadisələri obyektiv mövqedən ehtirasla tənqid edir. Burada «tənqidolunmazlar»
adlanan yazıçı elitasının ədəbi zərərindən, bədii inkişafa necə durğunluq
gətirməsindən də yeri gəldikcə söhbət açılır» (səh.5.).
Altı fəsildən ibarət olan fundamental tədqiqat əsərində N.Şəmsizadə ədəbi
proses və tənqidin estetik təbiəti, tənqidin ədəbi prosesdə rolu, tənqidçi şəxsiyyəti
və ədəbi proses, mətbuat və ədəbi tənqid, estetik meyar və bədii mahiyyət, tənqidin
nüfuzu və ədəbiyyatşünaslıq kimi problemlər ətrafında ciddi söhbət açılır,
müəllifin təbirincə desək «tənqid etmək mədəniyyətindən, haqlı tənqidə dözmək
bacarığından», «tənqidolunmazlar sarayında tərif sığalının ən müasir üsulları ilə
xumarlanıb uyuyanların əsl ədəbiyyatdan necə uzaqlaşmalarından» bəhs edir,
tənqidçi, yazıçı, oxucu münasibətlərinin aydınlaşdırılmasına çalışır. N.Şəmsizadə
tədqiqatı təkcə dərinliyi, analitik gücü, dəmir məntiqi, dolğunluğu ilə yox, həm də
kəsərliliyi və kəskinliyi, cəsarəti ilə fərqlənir. Adını çəkdiyimiz əsərin qələmə
alındığı dövrdə xalqımızın tarixində və taleyində əvəzolunmaz rol oynamış bir sıra
mətbu orqanlar «mürtəce», «əksinqilabçı»,«burca» damğaları ilə gözdən salınır,
onlara qarşı qərəzli və saxta münasibət formalaşırdı. N.Şəmsizadə isə ağılın və
məntiqin gücünə istinad edərək «Fiyuzat» ədəbi məktəbi ilə bağlı müstəqil (! –
kursiv A. Tahirlinindir) tədqiqat əsərinin olmadığını qeyd edirdi və yazırdı:
«Qəribədir, «Molla Nəsrəddin ədəbi məktəbinə daxil olan sənətkarlar, xüsusilə
Mirzə Cəlil və Sabir haqqında onlarla sanballı tədqiqat əsərləri yazılmış və bu
əsərlərin hamısında belə bir fikir var ki, Molla Nəsrəddinçilər «Fiyuzat»a qarşı
mübarizə aparmışlar. Amma, heç kim ətraflı şəkildə demir ki, axı «Fiyuzat»çıların
ədəbi estetik konsepsiyası nədən ibarətdir?! Elə bu səbəbdən də tədqiqatlarda
«Molla Nəsrəddin» və demokratik nəzəri fikir haqqında verilən mülahizələr
tarixilik baxımdan kifayət qədər obyektiv görünmür». (səh. 334)
Tədqiqatçı bununla kifayətlənmir problemi bütün ciddiliyi və tərəfləri ilə açır,
onun üzərinə gedir: «Digər tərəfdən mahiyyətcə idealist olduğuna görə Hegel
fəlsəfəsini
öyrənməmək
çağırışı
nə
qədər
gülüncdürsə
Azərbaycan
ədəbiyyatşünaslığının da XX əsrin əvvəllərində ədəbi, ictimai və fəlsəfi estetik
fikrin yarısını təşkil edən «Fiyuzat ədəbi məktəbinin öyrənilməməsi bir o qədər
ajınajaqlıdır. Bu işi isə obyektiv tarixilik əsasında görmək olar. Məhz həmin
prinsip bunu bizdən təkidlə tələb edir» (yenə orada. səh. 335).
Azərbaycan ədəbi-mədəni, fəlsəfi, ideoloji fikir tarixinin qüdrətli simalarından
Ə.Ağaoğlu, Ə.Hüseynzadə, Ə.Topçubaşov irsinin bir tərəfli və qərəzli
araşdırıldığı, yaxud irsin öyrənilməsinə yasaq qoyulduğu bir vaxt N.Şəmsizadə
ürək ağrısı ilə cəmiyyətə müraciət edirdi: «Niyə biz çox qüvvətli burjua
ədəbiyyatşünaslıq məktəbini, Ə.Hüseynzadəni, Ə.Ağayevi, Ə.Topçubaşovu yaxud
demokratik tənqidi ayrıca tədqiq etməyək? M.Qorki yazır « nəinki yalnız
klassiklərdən, əgər ağıllıdırsa, hətta düşməndən də öyrənmək lazımdır» Bu mənada
fikrimizcə, «Fiyuzat» ədəbi məktəbi tarixilik prinsipi əsasında konseptual şəkildə
öyrənilmədikcə, estetik fikir tariximizin ən zəngin mərhələlərindən olan XX əsrin
ədəbi prosesi, xüsusən romantizm haqqında bildiklərimiz eklektik olaraq
239
qalacaqdır» (yenə orada. səh.334). Bu sətirlərin arxasında N.Şəmsizadənin yanan
ürəyini, çatılmış qaşlarını, qələmi bütün qüvvəsi ilə sıxan barmaqlarını görməmək
mümkün deyil.
N.Şəmsizadə təhlil obyektinə necə diqqət və həssaslıqla yanaşırdısa, tədqiqata
xidmət edən materiala – mənbə və məxəzlərə də o qədər hörmətlə müraciət edir.
Onun tənqidi saf, səmimi olduğu qədər də hər cür qərəz, kin küdurətdən uzaqdır, o
yazıçıya yol göstərmir, onun əlindən tutub istiqamətləndirmir, yaxşı yolun
konturlarından bəhs edir. Bu o demək deyil ki, tənqidçi görüşlərində liberaldır və
güzəştə gedir. Əsla. Əslində N.Şəmsizadə sənət adına yaraşmayan hər cür materialı
qətiyyən rədd edir, istər belletristika, istər tənqid nümunəsi olsun, N.Şəmsizadə
ondan ehtiras, pafos, məhəbbət və fəaliyyət ritmi, cövhərini böyük həyat eşqi
müəyyən edən əsər istəyir.
Daim axtarmaq, yeni söz demək həvəsi ilə çalışan N.Şəmsizadə taleyüklü
mövzularda silsilə məqalələr yazır, tarixin müəyyən dövrlərində iz salmış, lakin,
sonradan düşmən münasibətin qurbanı olmuş xadimlərin haqlarının qaytarılması
üçün fədakarlıq etmişdir. Bu mənada onun «Unudulmuşlar haqqında uvertüra» ,
«Ehkamlar dağılanda», «İtmiş nəslin ardınca», «Tariximizin Tağıyev mərhələsi»
kimi məqalələri diqqəti çəkir.
Mövzuya ən müxtəlif rakurslardan yanaşmaq məharəti ilə yadda qalan
N.Şəmsizadə düşündürən, həm də faydalı nəticələri və qənaətləri seçilir. Çoxəsrlik
gülüş mədəniyyətimizdən, onun xalqımızın adət və ənənəsində, psixologiyasında,
həyat və düşüncə tərzində yeri və rolu barədə yazdığı «Hıçqıran gülüşlər» əsəri
fikrimizi təsdiqləyir.
«Azərbaycan ideologiyası» adlı əsərində Nizaməddin Şəmsizadə həm də bir
filosof, politoloq kimi səhnəyə çıxır. Azərbaycan milli ideologiyasının rüşeymləri,
yaranması, formalaşması, mərhələləri əsasları haqqında əsəri 1937-ci ildə
M.B.Məmmədzadənin qələmə aldığı və 1938-ci ildə Berlində «Qurtuluş»
məcmuəsinin mətbəəsində çap etdiyi «Milli Azərbaycan hərəkatı» adlı kitabından
sonra müasir kriteriyalarla mövzu və problemə yeni baxışdır.
Əlbəttə, biz N.Şəmsizadənin tədqiqatlarından daha geniş bəhs edə bilərdik
Onun ədəbi yaradıcılığı da söhbətin maraqlı mövzusudur. Professorun zəngin
təcrübəyə əsaslanan, ehtiraslı pedaqoji fəaliyyəti ən yüksək dəyərə layiq ayrıca
tədqiqat predmetidir. Bunları reallaşdırmaq, həm də təxirə salmadan həyata
keçirmək, fikrimizcə, daha çox elmi-ədəbi və pedaqoji ictimaiyyətin xeyrinədir.
Söhbətin əvvəlinə qayıdaraq deməliyəm ki, unudulmaz müəllim və hələ
sağlığında Azərbaycan jurnalistlərinin ağsaqqalı adını qazanmış N.İmanquliyevin
öz tələbələrinə tövsiyəsinə əməl etdim. Əgər nəticədə, qəhrəmanın ünvanına çoxlu
xoş sözlər söylədimsə, bu mənim səxavətim yox, onun xidmətidir. Bir tənqidçi,
yazıçı pedaqoq kimi N.Şəmsizadənin ünvanına, şəninə kim nə qədər xoş söyləsə,
ehtiyat etməsin. Çünki, o buna layiqdir.
“525-ci qəzet”,12 oktyabr 2004
240
P
ortretə Ģtrixlər
Bir neçə il əvvəlin söhbəti olsa da, indiki kimi xatırlayıram. Dostlarımdan
biri məni Böyük Qafqaz dağlarının ətəyində muncuq kimi sıralanmış bölgələrdən
birinə həsr olunmuş mahnının təqdimatına dəvət etmişdi. Məmnuniyyətlə razılıq
verdim və tədbirə qatıldım. Mahnı mətni doğma yurda sevgi ilə qələmə alınsa,
orada bər-bəzəkli sözlərdən, qurultulu ibarələrdən gen-bon istifadə edilsə də,
məzmun çox kasad görünürdü, rayonun tarixi, sakinləri, təbiəti və bugünkü
inkişafı, özünəməxsus digər xüsusiyyətləri, xarakterik cəhətləri şeirdə əksini
tapmamışdı. Musiqi şən və oynaq olsa da, yüngül təsir bağışlayırdı, mahnının
mətni kimi onda da sanbal yox idi. Məclis əhli münasibət bildirməyə başladı. Kimi
göz yaşlarını silərək, kimi sonsuz qürur və fəxarətlə zilə qalxır, mahnını ağızdolusu
tərifləyir, kimisi də bəmdən gedir, ehtiyatlı ifadələrlə təqdimatı «yola verirdi».
Növbə mənə çatanda tədbirin təşkilatçılarına təşəkkürümü bildirdim, şairə, mahnı
müəllifinə minnətdarlıq etdim ki, öz istedad və bacarıqları səviyyəsində haqqında
söhbət gedən bölgəyə məhəbbətlərini izhar ediblər. Sonra tədbirin iştirakçılarına
belə bir sualla müraciət etdim: - Şeirdə adı çəkilən rayonun əvəzinə «Şəki»,
«Qax», «Balakən», yaxud «İsmayıllı» sözlərini yazsaq, mətnə xələl gələrmi, nə
dəyişər? Məncə heç nə?
Yerbəyerdən yarızarafat, yarıciddi replikalar eşidildi: «Lənkəran»,
«Masallı», «Lerik» sözləri də gedər. Kimsə lap ağ elədi: lap «Cəlilabad»,
«Biləsuvar», «Neftçala» da yazmaq olar. Mən davam etdim: - Bununla çəkilən
zəhməti yerə vurmaq, heçə endirmək istəmirəm. O, yerlərin adamları, onların
həyat, düşüncə tərzləri, adət-ənənələri kimi təbiəti, çayları, dağları, meşələri də bir-
birinə bənzəyir. Amma hərəsinin öz adı, öz siması, hər rayonun öz tarixi, özünəxas
cəhətləri, maddi-mədəni abidələri var. Məncə, bu cəhəti unutmaq olmaz…
Budur, indi özüm öz tələbim qarşısındayam. Çox hörmətli bir nəfər
professor haqqında ürək sözlərimi yazmalıyam. «İstedadlı», «zəhmətkeş», «daim
axtaran-arayan», «gənclərə diqqətlə yanaşan, onlara yol göstərən», «öz üzərində
işləyən», «elmi yenilikləri izləyən», «iti müşahidə, təhlil qabiliyyətinə malik»,
«real, obyektiv dəyərləndirmək məharəti olan» kimi şablonlar işimə yaramır.
Kimsə oxuyar və mənə sual ünvanlayar ki, ömrünü-gününü elmə, təhsilə həsr edən
hansı professorun ünvanına bu sözləri işlətmək olmaz?! Bəs haqqında yazacağım
professor
Nizami
Məmmədovun
(Tağısoy)
bütün
bunlarla
yanaşı
özünəməxsusluğu, fərdi keyfiyyətləri hansılardan, nədən ibarətdir? Professorlar
qalereyasında Nizami müəllimin maraqlı olduğu qədər də diqqətçəkən və zəngin
həyat yolu var. Hələ məktəb yaşlarından əlinə qələm alan Nizaminin imzası
əvvəlcə şagirdlərin buraxdığı divar qəzetində, sonra rayon qəzetində, daha sonralar
isə respublika mətbuatında görünməyə başladı. Şeir və məqalələri Yuxarı Şilyan
kəndindən bir istedadın boylandığından, «mən də varam», «mən də gəlirəm»
mesajından xəbər verirdi. O vaxt boylanırdı ki, neçə illər sonra yazsın:
«Yaşamaq mənimdir, yanmaq mənimdir
Dünyanı dərk edib, anmaq mənimdir,
241
İnsanı insantək sanmaq mənimdir…».
(Sən yaşamırsan)
Gəlirdi ki, illər sonrası millətin səsini, fəryadını, dərdini, faciəsini bütün
gücü ilə hayqırsın:
«Beş yerə paylanıb Vətən torpağı,
Tutub dörd bir yanı qaniçən yağı,
Talanıb bağçası, bostanı, tağı…».
(«Bilirəm-bilmirəm»)
İgidlərə, ərənlərə səslənmək, onları səfərbər etmək üçün gəlirdi:
İgidlər səf düzülməsə,
İxtilaflar çözülməsə,
Vətən bütöv edilməsə,
Bilməm, neyçün yaşayıram?!
(Bilməm, neyçün yaşayıram)
Nizami həm də ürəklərə od, köz salmaq, sevmək, sevilmək üçün boylanırdı,
gəlirdi:
O mavi gözlərin – bir zümrüd qaşı,
Baxanda məst edir dağı, daşları,
Odlanır dünyanın qurusu, yaşı,
Mən də alışıram, mən də yanıram…
(«Sevgimə vermirsən aman»)
Bütün bunları, bunlardan daha çoxunu demək üçün Nizami «Ptolomeyin
yadigarı», «fateh və sərkərdələrin hədəfi», «qonaq-qaralı, dostlara vəfalı, düşmənə
xəncər» Şilyandan böyük həyata qədəm qoyurdu. İlk addımları kövrək, lakin
inamlı idi. Yoluna çıxan toz-torpaq, daş-kəsək ona, onun yürüməsinə mane ola
bilməzdi. Məktəbi bitirdikdən sonra bir müddət istehsalatda alın təri tökdü, əzələlər
möhkəmləndi, əllər qabardı. Növbədə əsgərlik vardı. Nizami bu borcu verməyə
artıq tam hazır idi və «kişilik məktəbi»ni də şərəflə, ləyaqətlə başa vurdu.
…Burada fasilə verir, yazılanlara nəzər salıram. Rəssamlar portret işləyəndə
bir nəfəsə onu başa vurmurlar ki! Fırçanı tablonun üstündə gəzdirir, geri çəkilir,
rənglərə tamaşa edir, götür-qoy edir, düşünür və yenidən fırçanı işə salırlar. Mən
də yuxarıda yazılanları Nizami Tağısoyun portretindən ştrixlər hesab edir və
növbəti cizgilərə keçirəm…
Yeniyə, yeniliyə can atmaq, təzə cığır açmaq, axtarmaq eşqi, həvəsi Nizami
Məmmədovla lap körpəlikdən yoldaşlıq edir, bu gün də bu həvəs, ehtiras, enerji
tükənmir. İlk yaradıcılığındakı – şeir və hekayələrindəki bu məziyyətlər sonralar
cilalandı, genişləndi, sistem halını aldı, yeni məzmun kəsb etdi, yeni müstəviyə
keçdi – elm aləminə qədəm qoydu.
242
Əsgəri xidmətdən sonra M.F.Axundov adına Azərbaycan Pedaqoji Rus dili
və Ədəbiyyatı İnstitutunun Rus dili və Ədəbiyyatı fakültəsini fərqlənmə diplomu
ilə bitirdi (1975). Bir müddət kənd məktəbində pedaqoji fəaliyyətlə məşğul olan
N.Məmmədovda baş qaldıran peşəkar tədqiqatçı olmaq arzusu onu məzunu olduğu
İnstitutun aspiranturasına gətirdi (1980-1984). İxtisasını və ruhunu (Səməd Vurğun
yaradıcılığı) birləşdirən «S.Vurğunun pyeslərinin rus tərcümələri və səhnə
təcəssümü»
mövzusunda elmi-tədqiqat işini uğurla bitirib namizədlik
dissertasiyasını müdafiə etdi(1986). Gənc alim N.Məmmədov hər dəfə əlçatmaz
hesab etdiyi zirvəni fəth etdikcə, qarşısında daha böyük yüksəklik görən və ona can
atan alpinist kimidir. O, ədəbiyyatşünaslıqla bağlı bir mövzuya girişir, onu
tamamlayır, sonra mövzu yeni mövzu gətirir, onun qarşısında təzə üfüqlər açılır. O,
irəliləyir, arxada isə tədqiqatçı alimin tədricən araşdırmalarından ibarət zəngin irsi
formalaşır…
İlk uğurlarından ruhlanan N.Məmmədov S.Vurğunun bir əsəri timsalında
rus-Azərbaycan ədəbi əlaqələri mövzusunda özünü sınayandan sonra cəsarət tapıb
daha geniş və fundamental problemə girişir: «XX əsr rus poeziyası Azərbaycan
tərcümələrində». O, bu mövzuda doktorluq dissertasiyasını uğurla müdafiə edir
(1992) və bir müddət sonra (1994) alim, Azərbaycan Respublikası Prezidenti
yanında Ali Attestasiya Komissiyasının qərarı ilə professor adına layiq görülür.
Bu, «XX əsr rus ədəbiyyatı», «Türk xalqları ədəbiyyatı», «Azərbaycan ədəbiyyatı»
fənlərindən rus və Azərbaycan bölmələrində mühazirələr oxuyan, kurs, buraxılış,
magistr, namizədlik işlərinə rəhbərlik edən, dərslik, dərs vəsaitləri, dərs
proqramları yazan, respublika mətbuatında saysız-hesabsız elmi məqalələr dərc
etdirən Nizami Tağısoyun halal əməyinə verilən qiymətdir. Professorun elmi
fəaliyyəti çoxşaxəli, çoxplanlıdır: tərcümə nəzəriyyəsi, ədəbi əlaqələr,
komparativistika, türk xalqlarının etnogenezi, etnologiyası, etnoqrafiyası, epik
təfəkkürü, ənənələri, folkloru, klassik və müasir ədəbiyyatı, çağdaş ədəbi proses.
İti zəkası, geniş təfəkkürü N.Tağısoya ədəbiyyatşünaslıq kimi böyük
ümmanda problemləri görmək, çözmək, sistemləşdirmək, dəyərləndirmək bacarığı
vermişdir. Türkdilli xalqların ədəbi xəzinəsinin araşdırılması ilə N.Tağısoy
Azərbaycanda türkologiyanın inkişafına ciddi töhfə vermişdir: qazax, özbək,
qaqauz, qaraqalpaq, qaraçay, qırğız, Kibrıs, malkar, xəzər və başqa türk qövmləri
ilə bağlı qələmə aldığı çoxsaylı əsərlər həm aktuallıq, həm də problemə yanaşma
metodu ilə diqqəti çəkir. Müəllifin «XX əsr rus poeziyası Azərbaycan
tərcümələrində» (Bakı, ADPİ nəşriyyatı, 1992, 134 s. – rus dilində), «Qazax
ədəbiyyatı» (Bakı, APRDƏİ nəşriyyatı, 1983, 70 s. – rus dilində), «Əslin milli
özünəməxsusluğu və tərcümə» (Bakı, «Mütərcim» nəşriyyatı, 1998, 68 s. –
dilində), «Səməd Vurğunun dramaturgiyası» (Bakı, 1999, «Səda» nəşriyyatı, 132 s.
– rus dilində), «Poetik tərcümə» (Bakı, «Maarif» nəşriyyatı, 2001, 245 s. – rus
dilində), «Qaraqalpaq ədəbiyyatı» (Bakı, «Kitab aləmi» nəşriyyatı, 2007, 296 s. –
rus dilində), «Nəsrin axarı: zaman və məkan konteksti» (Bakı, BQU nəşriyyatı,
2008, 152 s.), «Şilyan: özü, sözü – çeşmənin gözü» (Bakı, «Mütərcim» nəşriyyatı,
2009, 172 s.), «Səftər Həsənzadə. Vətən həsrəti, barıt qoxulu sətirlər» (Bakı,
«Mütərcim» nəşriyyatı, 2009, 76 s.) kimi monoqrafiya və kitabları elmi
243
ictimaiyyətin və təhsil auditoriyasının daim diqqətində olmuş, mütəxəssislər,
xüsusi ilə türkoloqlar tərəfindən yüksək qiymətləndirilmişdir.
İstedadlı alim öz yaradıcılığında ədəbi mühitə, ədəbi prosesə iki
istiqamətdən yanaşır və onun elmi-nəzəri qənaətləri bu aspektlərdən formalaşır. Bir
tərəfdən o, ümumən, ədəbi problemləri araşdırır, analiz edir, sahənin nəzəri
materiallarını zənginləşdirirsə, digər tərəfdən ayrı-ayrı yazıçı və şairlərin
yaradıcılığını tədqiqat müstəvisinə çıxarır, onların əsərlərində mövzu, dil-üslub,
sənətkarlıq məsələlərini təhlil süzgəcindən keçirir. Bu baxımdan professorun Elçin,
Anar, S.Əhmədli, M.Cəlal, K.Abdulla, eləcə də A.Blok, S.Yesenin, K.Simonov,
A.Tvardovski və digərlərinin irsi ilə bağlı özünəməxsus mülahizələrə, maraqlı
mühakimələr və elmi nəticələrlə zəngin məqalələri diqqəti çəkir.
Prof.N.Tağısoyun etnoqrafiya, folklor nümunələri ilə bağlı cəfakeş fəaliyyəti
qeyd olunmasa, onun portretində müəyyən ştrixlərin yeri görünər. 25 ilə yaxındır
ki, Nizami müəllim dərviş dözümü, pərvanə sevgisi, Fərhad fədakarlığı ilə öz
sevdasının – şifahi xalq nümunələrinin türklər demiş, peşindədir. Onun
etnoqrafiya, etnik-milli düşüncə və həyat tərzi ilə bağlı topladığı şifahi söz
nümunələri türkdilli xalqların ortaq milli-mənəvi dəyərlərinin müqayisəsi,
qiymətləndirilməsi baxımından böyük əhəmiyyət kəsb edir. Doğulub boya-başa
çatdığı doğma Şilyan kəndindən misqal-misqal topladığı, mirvari dənələri kimi
sıraladığı alqışlar, qarğışlar, andlar, sınamalar, ayamalar, ləqəblər, bayatılar,
laylalar, lətifələr, habelə dini-tarixi abidələrlə ziyarətgah və ocaqlarla bağlı
rəvayətlər nəinki oxucuların ürəyinə, eləcə də mütəxəssislərin yaradıcılıq
laboratoriyasına yol tapacaq, professorun dediyi kimi, onları «düşünüb
fikirləşməyə, fikirləşib düşünməyə sövq edəcək, onlar sözün gücündən zövq
alacaq, ona heyran qalacaq, xalq fəlsəfəsi və müdrikliyi haqqında dərindən
düşünəcək», bu zəngin, mənalı irslə bağlı müəyyən qənaətlərə gələcəklər.
Professorun portretində tərcüməçilik və lüğətçilik fəaliyyətinin də xüsusi
yeri var. Tərcümə nəzəriyyəsi və bədii tərcümə məsələləri sahəsindəki işinə bir
cümlə ilə qiymət vermək olar: o, bu sahədə peşəkardır. O, Azərbaycan
türkologiyasında ilk dəfə «Qaraqalpaq xalq nağılları»nı (Bakı, 2006,
«Mütərcim» nəşriyyatı, 220 səh.) və qazax qəhrəmanlıq eposu «Koblandı-batır»
(Bakı, 2010, Folklor İnstitutu nəşriyyatı, 200 səh.) Azərbaycan türkcəsinə
uyğunlaşdırmış, bir neçə şeir, poema kitabını rus dilinə tərcümə etmiş,
prof.R.Manafoğlu və dos.Rüstəm Kamalla birlikdə ölkəmizdə ilk dəfə «İzahlı
tərcüməşünaslıq terminləri lüğəti»ni (Bakı, 2010, «Mütərcim» nəşriyyatı, 164 səh.)
hazırlamışdır.
Prof.N.Tağısoyun elmi, bədii yaradıcılığını onun ictimai və pedaqoji
fəaliyyətindən ayrı təsəvvür etmək mümkün deyil. Bu fikri başqa cür də ifadə
etmək olar: bu fəaliyyət sahələri N.Tağısoyun timsalında bir-birini tamamlayır, bir-
birindən qidalanır, bir-birini zənginləşdirir.
Və sonda. Yuxarıda yazılanlar prof.N.Tağısoyun yaradıcılıq portretinin
ştrixləridir. Nə qədər uğurlu, qənaətbəxşdir – deyə bilmərəm. Bu, bir qələm
dostunun cəhdidir. Amma peşəkar rəssam əlində fırça onun kətan üzərində
portretini işləmək eşqinə düşsə, məsləhət görərdim ki, Nizami Tağısoyun
244
təbəssümünü unutmasın. Nizami müəllimin təbəssümsüz portreti qarsız zirvə kimi
görünər.
Dostları ilə paylaş: |