Kurs: II fənn: Pedaqogika -2 Mövzu

Məktəbdaxili qiymətləndirmə. Bu qiymətləndirmə adından bəlli olduğu kimi məktəbdə həyata keçirilir. Səmərəli qiymətləndirmənin təmin edilməsi üzrə fəaliyyətlə­rini planlaşdırmaq üçün müəllimlər həm qiymətləndirmənin ümumi məqsədini, həm də qiymətləndirmənin hər növünün ayrı – ayrılıqda məqsəd, məzmun və prosedurları haqqında mükəmməl biliklərə malik olmalıdırlar.
Bu parametrlər üzrə məktəbdaxili qiymətləndirmə üç növə bölünür:

• 
  Diaqnostik qiymətləndirmə (ilkin səviyyənin qiymətləndirilməsi)
  
• 
  Formativ qiymətləndirmə (inkişafın izlənməsi)
  
• 
  Summativ (yekun qiymətləndirmə)
  

P.2.İlkin (diaqnostik ) qiymətləndirmə. Diaqnostik qiymətləndirmə - şagirdlərdə formalaşmış bilik, bacarıq, vərdiş və səriştələrin ilkin səviyyəsinin müəyyənləşdiril­məsidir. Düzgün təşkil olunmuş diaqnostik qiymətləndirmə şagirdlərə öyrənilmiş materialın təkrarında vaxt itkisinə,onun üçün aydın olmayan və başa düşülməyən məsələlərin qalmasına imkan vermir. İlkin səviyyənin qiymətləndirilməsi üçün suallar elə tərtib olunmalıdır ki, onlar şagirdin hansı biliklərə malik olduğunu müəyyən etsin. Diaqnostik qiymətləndirmə adətən tədris ilinin başlanğıcında, fəslin birinci mövzusunun tədrisindən əvvəl, şagird sinfi və məktəbi dəyişdikdə keçirilir. Qiymətləndirmənin bu növü həm müəllim, həm də şagirdə mövcud situasiya və tələblər haqqında düzgün təsəvvür yaratmağa kömək edir.
Diaqnostik qiymətləndirmənin məqsədi – şagirdlərin təlim məqsədlərinə dair harada olmaları, yəni proqram üzrə mövzunun, tədris vahidinin əvvəlində hansı bilik və bacarıqlara malik olmaları haqqında məlumatların əldə edilməsidir.
İlk mərhələdə diaqnostik qiymətləndirmə fənn üzrə təlim səviyyəsinin, yəni şagirdin kursun, mövzunun öyrənilməsinə başlamadan əvvəl malik olduğu bilik, bacarıq, vərdiş və səriştənin formalaşma səviyyəsinin ilkin təhlilidir (burada dövlət standartı tələblərinə müvafiq sual və tapşırıqlar əvvəl öyrənilmiş mövzu, bölmələr üzrə tərtib olunmalıdır). Bu iş müəllimə yeni materialın öyrənilməsində hansı hissədə problemin yarana biləcəyi haqqında məlumat əldə etməyə və onların aradan qaldırılması üçün addımlar planlaşdırmağa kömək edəcək.