“AZƏRİ” CƏMİYYƏTİ
(Tolyatti)
Tolyattidəki “Azəri” Cəmiyyəti şəhərdə yaşayan azərbaycanlıları bir
ictimai təşkilat ətrafında birləşdirmək məqsədilə yaradılmışdır. Cəmiyyət
həmvətənlərimizə Azərbaycanda baş verən ictimai-siyasi hadisələr,
xüsusən erməni təcavüzkarlarına qarşı xalqımızın apardığı müharibə
haqqında operativ, doğru düzgün məlumat çatdırmaq üçün öz fəaliyyətini
durmadan genişləndirir. Cəmiyyətin üzvləri şəhər əhalisi içərisində
Azərbaycandakı demokratik proseslər barədə, erməni millətçilərinin
xalqımıza qarşı yaydıqları böhtanların ifşa olunmasına xüsusi diqqət
yetirirlər. Cəmiyyət Azərbaycanla iqtisadi və mədəni əlaqələrin
möhkəmlənməsi sahəsində əməli tədbirlərin həyata keçirilməsində
yaxından iştirak etməyə çalışır.
“AZƏRİ” MİLLİ MƏDƏNİ CƏMİYYƏTİ
(Krasnoyarsk)
Krasnoyarskda azərbaycanlıların milli-mədəni cəmiyyət yaratmaq
təşəbbüsləri xeyli müddət nəticəsiz qalmışdır. Nəhayət, 1990-cı ildə
“Azəri” Milli-Mədəni Cəmiyyəti yerli inzibati orqanlar tərəfindən
qeydiyyatdan keçmiş və fəaliyyətə başlamışdır. Lakin yerli erməni
diasporunun səyi nəticəsində bəzi yerli millətçi qüvvələrin təzyiqi ilə
yenicə təşkil olunmuş Cəmiyyətin fəaliyyəti üçün uzun müddət imkan
olmamışdır. Yalnız 1992-ci ilin əvvəllərindən Cəmiyyət ciddi iş aparmağa
başlamışdır. Cəmiyyətin sədri Süleyman Süleymanovdur. Cəmiyyət
Krasnoyarskda yaşayan azərbaycanlılar və qeyri millətlər arasında
təbliğat işini gücləndirmişdir. Cəmiyyət bütün vasitələrdən istifadə
edərək Qarabağda ermənilərin vəhşilikləri, rus imperiya ordusunun köməyi
və texnikası ilə dinc əhaliyə divan tutulması, Xocalı faciəsinin törədilməsi,
Azərbaycanın sərhədlərində edilən təcavüz və ümumiyyətlə
respublikamızda baş verən ictimai-siyasi hadisələr barədə həqiqəti
krasnoyarlılara çatdırmağa, informasiya blokadasını yarmağa çalışır.
Cəmiyyətin üzvləri müxtəlif mədəni tədbirlərlə yanaşı, respublikamıza,
xüsusən milli ordumuza maddi yardım etmiş və bu işi davam etdirmək
sahəsində geniş fəaliyyət göstərirlər.
“AZƏRİ” CƏMİYYƏTİ
(Tomsk)
“Azəri” Cəmiyyəti 1990-cı ilin mayında uzaq Sibirin Tomsk
şəhərində yaranmışdır. Sədri Elman Yusifovdur. Vilayətdə on minə yaxın
azərbaycanlı yaşayır. Onlar əsasən tələbələr, fəhlələr, biznesmenlər,
həkimlər və hərbçilərdir. Tomskdakı azərbaycanlıların bir-biri ilə
əlaqələrinin möhkəmlənməsində Bakıda 1990-cı il qanlı yanvar hadisələri
güclü təsir göstərmişdir. Cəmiyyətin üzvləri vilayətdə Azərbaycan
haqqında həqiqəti yaymağa çalışır. Televiziyada ayda bir dəfə
“Musulmanskiy vestnik” adlı verilişdən istifadə edərək Azərbaycanda
demokratik prosesləri işıqlandırır, Qarabağ hadisələri ilə bağlı mətbuat
orqanlarında məqalələr çap etdirir, erməni təcavüzkarlarının haqsız torpaq
iddialarına düşdüklərini tarixi dəlillərlə, tutarlı faktlarla göstərməyə çalışır,
ermənilərin Azərbaycan torpaqlarında törətdikləri vəhşilikləri ifşa edirlər.
Azərbaycan xalqının apardığı müharibəyə, xüsusən Qarabağ el yardımının
təşkilində Cəmiyyət xeyli iş görür.
Cəmiyyət vilayətdə yaşayan azərbaycanlıların vətən torpağı ilə
əlaqələrinin möhkəmlənməsinə çalışır. Bu məqsədlə milli mənliyin,
mənəvi varlığın qorunub saxlanılması, yeniyetmələrin vətənə məhəbbət
ruhunda tərbiyəsi ilə əlaqədar tədbirlərin keçirilməsində fəallıq göstərir,
Milli bayramlar, xüsusən Novruz bayramı hər il lazımınca qeyd olunur,
poeziya axşamları keçirilir, görüşlər təşkil olunur.
“BABƏK” AZƏRBAYCAN CƏMİYYƏTİ
(İvanovo)
Rusiya Federasiyasının vilayət mərkəzi İvanovo şəhərində fəaliyyətə
başlayan “Babək” Azərbaycan Cəmiyyəti 1988-ci ildə yaranmışdır.
Cəmiyyətin ilk yaradıcıları İvanovo mühəndis inşaat institutunun tələbələri
olmuşlar. Cəmiyyət öz fəaliyyətinə İvanovo şəhərində Azərbaycan
günlərinin keçirilməsi ilə başlamışdır. Ermənistandan öz torpaqlarını tərk
etməyə məcbur olan azərbaycanlı qaçqınların ilk dəstələri gəlməyə
başladığı günlərdə Cəmiyyət qaçqınlar fonduna pul vəsaiti toplanılmasında,
həmin vəsaitin Bakıya çatdırılmasında fəal iştirak etmişdir. Bakıda 1990-cı
il faciəli yanvar hadisələri baş verən zaman Cəmiyyətin üzvləri bu barədə
əhaliyə obyektiv informasiyanın çatdırılması üçün mümkün olan bütün
vasitələrdən istifadə etmişlər. Cəmiyyət öz fəaliyyətində iki respublika
arasında iqtisadi, siyasi və mədəni əlaqələrin genişlənməsinə, milli
mədəniyyətimizin həmvətənlərimiz arasında təbliğinə çalışır.
“DOSTLUQ” CƏMİYYƏTİ
(Koqalım)
Tümen vilayətinin Koqalım şəhərində yaşayan azərbaycanlıların
“Dostluq” Cəmiyyəti 1991-ci ilin fevralında qeydiyyatdan keçərək
fəaliyyətə başlamışdır. Sədri Faiq Ağayevdir. Cəmiyyət öz əsas məqsədini
vətəndə uzaqda yaşayan soydaşlarımız arasında sıx əlaqə yaratmaqda,
azərbaycanlılarla başqa millətlərin dostluğunu, qarşılıqlı münasibətlərini
möhkəmləndirməkdə görür. Cəmiyyətin əsas bir məqsədidə
Azərbaycanla hərtərəfli mədəni və mənəvi əlaqələr yaratmaqdır.
Cəmiyyətin üzvləri Azərbaycandakı hadisələr, ermənilərin torpaqlarımıza
təcavüzü, vəhşilikləri barədə koqalımlılara məlumat vermək üçün
videofilimlər, kassetlər, fotosənədlər nümayiş etdirirlər. Eyni zamanda
“Koqalımski raboçi” və “Neftyanik Koqalıma” qəzetlərində çıxış edirlər.
Cəmiyyətin üzvləri Xocalıda, Laçında baş verən hadisələrə həsr edilmiş
etiraz mitinqləri keçirmiş, Azərbaycan Milli Müdafiə Nazirliyinin fonduna
xeyli məbləğdə pul köçürmüşlər. Cəmiyyət Qarabağ torpağında gedən
müharibə barədə müntəzəm, etibarlı məlumat almaq üçün Azərbaycanın
“Qarabağ Nicat Cəmiyyəti” ilə əlaqə yaratmışdır.
“NİZAMİ” AZƏRBAYCAN MƏDƏNİYYƏT
CƏMİYYƏTİ
(Yekaterinburq)
“Nizami” Azərbaycan Mədəniyyət Cəmiyyəti 1990-cı ildə
yaranmışdır. Cəmiyyətin yeddi minə kimi üzvü vardır. Yeddi nəfərdən
ibarət idarə heyəti Cəmiyyətin fəaliyyətinə rəhbərlik edir. Sədri Malik
Nağıyevdir. Cəmiyyətin əsas fəalları müxtəlif istehsal sahələrinin, müxtəlif
ixtisasların, sənət və peşə sahiblərinin, tələbələrin nümayəndələridir.
Cəmiyyətin üzvlərini bir amal birləşdirir: milli mədəniyyətimizi, irsimizi,
tariximizi, adət-ənənəmizi tanıtmaq, qoruyub saxlamaq və təbliğ etmək.
Cəmiyyət “Qarabağ” ansamblı yaratmış, futbol komandası təşkil etmişdir.
Cəmiyyət Azərbaycan Mədəniyyət Nazirliyi Respublika Mədəniyyət
Fondu, Xalq Təhsili Nazirliyi ilə əlaqə yaratmışdır. Cəmiyyətin nəzdində
Azərbaycan xalq mədəniyyəti universiteti təşkil edilmişdir. Şəhər
qəzetlərində Cəmiyyətin üzvlərinin məqalələri dərc edilir. Cəmiyyət
Azərbaycanda gedən ictimai-siyasi proseslər, demokratik dəyişikliklər,
erməni təcavüzünə qarşı mübarizə haqqında həqiqəti yaymaq sahəsində öz
işini istiqamətləndirir.
“OZAN” MƏDƏNİYYƏT MƏRKƏZİ
(Samara)
Samara şəhərində fəaliyyət göstərən “Ozan” mədəniyyət Mərkəzi
1990-cı ildə yaradılmışdır. Sədri Elmar Rəsulovdur. Samara vilayətində 40
mindən artıq soydaşımız yaşayır. Mərkəzin əsas vəzifələrindən biri
həmvətənlərimizi bir təşkilat ətrafında birləşdirmək, onların ictimai-siyasi
fəallığını artırmaq, milli mədəniyyətimiz və adət-ənənələrimizi qoruyub
saxlamaq, siyasi və mədəni həyatında baş verən dəyişikliklərə Samara
şəhərində və vilayətin digər yerlərində yaşayan azərbaycanlıları müntəzəm
olaraq tanış etməyi, erməni təcavüzünə məruz qalan xalqımıza maddi və
mənəvi kömək göstərməyi də öz əsas vəzifəsi hesab edir. Mərkəzin ayrıca
kitabxanası var və Azərbaycandan müxtəlif qəzet və jurnallar alır.
“ODLAR YURDU” AZƏRBAYCAN MƏDƏNİYYƏT
CƏMİYYƏTİ
(Ulyanovsk)
“Odlar Yurdu” Azərbaycan Mədəniyyət Cəmiyyəti öz fəaliyyətinə
1989-cu ilin əvvəllərində başlasa da, yalnız 1990-cı ilin mayında
Ulyanovsk Vilayət İcraiyyə Komitəsində qeydiyyatdan keçmişdir.
Ulyanovsk vilayətində 12 min nəfərdən çox azərbaycanlı yaşayır. Onların 6
mini Ulyanovsk şəhərinin sakinidir. Cəmiyyətin 4 minə yaxın üzvi vardır.
Cəmiyyətə idarə heyəti və Ağsaqqallar Şurası rəhbərlik edir. Cəmiyyətin
sədri Şakir Göyüşovdur. Cəmiyyət yarandığı ilk günlərdən öz əsas
vəzifələrindən birini Azərbaycan haqtında, xüsusən Dağlıq Qarabağ
hadisələri barədə ermənilərin yaydıqları böhtanları və iftiraları ifşa
etməkdə görürdü. Bakıda 1990-cı il yanvar faciəsi ilə əlaqədar Cəmiyyətin
üzvləri tatarların “Tuqan Tel” Cəmiyyəti ilə Ulyanovsk
televiziyasında dəyirmi stol keçirmişlər. Qanlı yanvar hadisələri zamanı
Bakıda həbs olunmuş və Ulyanovsk həbsxanasında saxlanılan
azərbaycanlının bir qrupuna Cəmiyyətin üzvləri vaxtilə mümkün olan
köməyi göstərmişlər.
“Odlar Yurdu” Cəmiyyəti Ulyanovskda fəaliyyət göstərən tatarların
“Tuqan Tel”, almanların “Dirçəliş”, çuvaşların “Kansaş”, rusların “Rus”,
yəhudilərin “Yəhudi” cəmiyyətləri ilə müntəzəm əlaqə saxlayır, bir sıra
birgə tədbirlər keçirir. Ayda bir dəfə yerli televiziyada Cəmiyyətin
üzvlərinin çıxışları üçün yarım saat ayrılmışdır. Cəmiyyətin təşəbbüsü ilə
hər il Milli İstiqlal Bayramı - 28 May və Novruz bayramı təntənə ilə qeyd
olunur.
“TƏBRİZ” AZƏRBAYCAN CƏMİYYƏTİ
(İrkutsk)
“Təbriz” Azərbaycan Cəmiyyəti 1992-ci ilin iyulunda təşkil olunmuş
və qeydiyyatdan keçmişdir. Cəmiyyət İrkutsk vilayətində fəaliyyət
göstərən 15 milli cəmiyyətlərdən biridir. İrkutsk vilayətində 4700
azərbaycanlı yaşayır. Cəmiyyətin fəaliyyətinə büro rəhbərlik edir. Sədri
Vüqar Hüseynovdur. İrkutskda mövcud olan bütün milli cəmiyyətlər, o
cümlədən “Təbriz” Cəmiyyəti xarici ölkələrlə dostluq evinin binasında
yerləşirlər.
Cəmiyyət xüsusən ukraynalıların milli cəmiyyəti ilə sıx əlaqə yarada
bilmişdir. Cəmiyyət öz işini qurmaqda respublika təşkilatları ilə əlaqələri
möhkəmləndirməyə çalışır, Azərbaycanın ictimai-siyasi həyatında baş
verən hadisələrə dair, xüsusən erməni təcavüzkarlarına qarşı xalqımızın
aparmalı olduğu müharibə haqqında obyektiv məlumat almaq, əsil həqiqəti
vilayətdə yaşayan həmvətənlərimiz, geniş ictimaiyyət içərisində yaymağa
səy göstərir.
“XƏZƏR” CƏMİYYƏTİ
(Həştərxan)
Həştərxanda yaşayan azərbaycanlıların 1992-ci ilin ortalarında
yaratdıqları Xəzər Cəmiyyəti öz fəaliyyətini soydaşlarımız arasında
mədəniyyətimizi, adətənənələrimizi yaşatmaq, Azərbaycandakı demokratik
proseslərə, erməni təcavüzünə qarşı aparılan müharibənin gedişi ilə tanış
etməyə yönəltmişdir. Həştərxanda 30 mindən çox azərbaycanlı yaşayır,
Cəmiyyət öz ətrafına hələlik onların cüzi bir hissəsini toplamışdır. “Xəzər”
Cəmiyyəti fəaliyyətini durmadan genişləndirir, Azərbaycanla əlaqələrin
möhkəmlənməsinə çalışır. Sərhədlərimizdə və Qarabağda gedən müharibə
barədə soydaşlarımıza düzgün və obyektiv məlumatlar çatdırmaq üçün
müxtəlif vasitələrdən istifadə edir. Cəmiyyətin üzvlərinin topladığı xeyli
miqdarda pul Azərbaycan Müdafiə Nazirliyinə göndərilmişdir.
“YURDDAŞ” AZƏRBAYCAN MƏDƏNİYYƏT
CƏMİYYƏTİ
(Saransk)
Mordvanın Saransk şəhərindəki “Yurddaş” Azərbaycan Mədəniyyət
Cəmiyyəti 1992-ci ilin oktyabr ayından fəaliyyətə başlamışdır. Onun
yaranmasında məqsəd Mordva və Azərbaycan arasında tarixən mövcud
olan iqtisadi və mədəni əlaqələri daha da möhkəmləndirmək və inkişaf
etdirməkdir. 200 nəfərə qədər olan bu Cəmiyyətin sədri Saransk
Universitetinin hüquq fakütltəsinin III kurs tələbəsi Azər Ələkbərovdur.
Cəmiyyətin gələcək fəaliyyət planlarında Şərq ədəbiyyatı kitabxanasını,
təsviri sənət muzeyini, Şərq mədəniyyət həvəskarlarının daimi fəaliyyət
göstərən klubunu yaratmaqdır. Cəmiyyətin fəalları Azərbaycan, Mordva,
Rusiya, Tatarıstan mədəniyyətlərinin problemlərinə həsr olunmuş
konfranslar və seminarlar keçirmək arzusundadırlar.
Cəmiyyət qərara almışdır ki, Saranskda həftədə bir dəfə ana dilini
öyrədən kurslar təşkil etsinlər.
TATARISTAN
“OĞUZ” CƏMİYYƏTİ
(Kazan)
“Oğuz” Cəmiyyəti 1988-ci ilin noyabrından fəaliyyətə başlamışdır.
Cəmiyyət Tatarıstanda yaşayan on min azərbaycanlının ünsiyyət mərkəzi
kimi iki türk xalqının mədəni əlaqələrinin möhkəmlənməsi sahəsində
səmərəli iş aparır. Cəmiyyətin sədri İbrahim İbrahimovdur. Cəmiyyətin
məqsədi Azərbaycan mədəniyyətini, onun tarixini, Tatarıstanda yaşayan
digər xalqlarla yaxınlığının təbliğinə, dostluq əlaqələrinin
möhkəmlənməsinə xidmət etməkdir. Azərbaycanda demokratik qüvvələrin
hakimiyyətə gəlməsi, Azərbaycan Respublikasının müstəqillik və
suverenlik yolunda atdığı uğurlu addımlar Cəmiyyətin işini xeyli
fəallaşdırır. Qarabağ münaqişəsində Azərbaycan xalqına dəyən maddi və
mənəvi ağrılar Cəmiyyətin üzvləri üçün də sınaq məktəbi olmuşdur.
Dəfələrlə Azərbaycan Respublikası Müdafiə Nazirliyinin fonduna
xeyli miqdarda pul vəsaiti köçürmüş, dava-dərman göndərilmişdir.
Cəmiyyətin üzvləri informasiya vasitələrində Azərbaycanda baş verən
hadisələrin qeyri-obyektiv işıqlandırılmasının qarşısını almaq məqsədi ilə
Tatarıstan televiziyası və radiosu ilə çıxışlar etmiş, yerli qəzetlərdə
vaxtaşırı təkzibedici materiallar dərc etmişlər.
“Oğuz” Cəmiyyəti mədəni qurum kimi xalqımızın milli
bayramlarının qeyd edilməsində, bu bayramlara Tatarıstanda yaşayan
xalqların nümayəndələrinin cəlb olunmasında geniş fəaliyyət göstərir.
Cəmiyyət müxtəlif müəssisələrdə və təşkilatlarda musiqi kollektivlərinin
iştirakı ilə müntəzəm olaraq konsertlər təşkil edir, vaxtaşırı yerli əhali
arasında xeyriyyə tədbirləri keçirirlər.
“Oğuz” Cəmiyyətinin üzvləri tatar dostlarının köməyi ilə Kazanın
İslam mərkəzinin yaxınlığındakı küçə və meydana dahi şairimiz Nizami
Gəncəvinin adının verilməsinə nail olublar. İndi həmin meydanda
Nizamiyə büst qoyulması üçün hazırlıq işləri aparılır.
TÜRKİYƏ
“AZƏRBAYCAN DOSTLUQ, KÜLTÜR VƏ
SƏNƏT DƏRNƏYİ”
(İzmir)
Dərnək 1991-ci ilin dekabrında İzmirdə yaradılmışdır. Sədri Namiq
Kamal Babaəkərdir. Dərnəyin yaradılması
İzmirdə yaşayan
azərbaycanlıların öz mədəniyyətləri ilə yaxından tanış olmaq, gənclərin
mədəniyyət tariximizi öyrənmələrinə şərait yaratmaq, xalqımızın
folklorunu yaşatmaq, Azərbaycandan İzmirə oxumağa gələn tələbələrə
kömək etmək məqsədi daşıyır. Dərnəyin üzvləri Azərbaycanın latın
qrafikalı əlifbaya keçməsinə kömək məqsədilə Türkiyə üzrə kitab-baxış
kompaniyası keçirir, Azərbaycana latın əlifbasında kitab göndərilməsini
təşkil etməsinə çalışır.
“AZƏRBAYCAN KÜLTÜR DƏRNƏYİ”
(Ankara)
“Azərbaycan Kültür Dərnəyi” 1949-cu il fevralın 1-də Ankarada
M.Ə.Rəsulzadə tərəfindən yaradılmışdır. Dərnəyin ilk sədri Həmid Atanan
olmuşdur. Dərnəyin fəaliyyətə başlamasını yalnız Türkiyədə yaşayan
azərbaycanlılar deyil, bütün Türkiyə ictimaiyyəti böyük razılıqla
qarşılamışlar. Dərnəyin təşkil etdiyi mədəni kütləvi tədbirlərdə,
Azərbaycan mədəniyyətini, ədəbiyyatını, tarixini təbliğ etməkdə onun
ətrafında birləşən azərbaycanlılar xüsusi fəallıq göstərmişlər. 1952-ci ildə
Dərnək “Azərbaycan” jurnalının nəşrinə başlamışdır. Dərnək öz nəşriyyat
fəaliyyətini bununla kifayətləndirmir, “Azərbaycan Kültür Dərnəyi
Yayımları” adlı silsilə nəşrlərin çapına başlayır. Bu silsilədən buraxılan 50-
yə yaxın kitab Azərbaycan mədəniyyətinə, ədəbiyyatına, tarixinə həsr
olunmuşdur. Bu silsilə kitablar içərisində M.Ə.Rəsulzadənin,
Ə.Yurdsevərin, K.Odərin və başqalarının əsərləri vardır. Dərnəyin
nəzdində uzun illərdən bəri folklor rəqs qrupu fəaliyyət göstərir. Bu qrup
bir çox Avropa ölkələrində Azərbaycan rəqsləri proqramı ilə çıxış etmişdir.
“Azərbaycan Kültür Dərnəyi”nin fəaliyyətində, onun gördüyü geniş
səmərəli işdə əsasən 20-ci illər mühacirləri, daha sonralar ikinci dünya
müharibəsi zamanı xaricdə qalmaq məcburiyyətində olan mühacirlər iştirak
etmişlər. Uzun illər ərzində Dərnəyin fəaliyyətinə müxtəlif vaxtlarda
R.Ünsal, Kərim Odər, Əhməd Yaşat, Cəmil Odelli, İsgəndər Ağüzüm,
Məhəmməd Kəngərli başçılıq etmişlər. “Azərbaycan Kültür Dərnəyi”nin
indiki sədri Əhməd Qaracadır.
“AZƏRBAYCANI TANITMA DƏRNƏYİ”
(Ankara)
“Azərbaycanı Tanıtma Dərnəyi”nin yaranması Azərbaycana erməni
təcavüzünün əsil mahiyyətini dünyaya çatdırmaq zərurətindən irəli
gəlmişdir. Dərnəyin sədri “Türkiyənin səsi” radiosunun Azərbaycan
verilişləri üzrə baş redaktoru, dərnəyin nəşr etdiyi “Araz” qəzetinin sahibi
Seyfəddin bəy Altaylıdır. Dərnəyin yüz nəfərdən çox üzvü vardır.
Azərbaycana erməni təcavüzünə qarşı Türkiyədə keçirilən siyasi
nümayişlərin, etiraz mitinqlərinin bir çoxunun təşkilatçısı “Azərbaycanı
Tanıtma Dərnəyi” olmuşdur. Dərnəyin üzvləri Xocalı faciəsi ilə əlaqədar
Ankarada, İstambulda və digər şəhərlərdə yaşayan həmvətənlərlə əlaqə
yaratmış, xarici nümayəndələrinin və hökumət binalarının qarşısında
piketlər və nümayişlər təşkil etmişlər. 1992-ci ilin martında ayrı-ayrılıqda
jurnalistlərin və siyasi partiya rəhbərlərinin müavinlərindən ibarət
yığıncaqların təşkilində dərnəyin üzvləri də yaxından iştirak etmişlər.
Dərnəyin “Araz” adlı qəzeti nəşr edilir. İctimai -siyasi qəzet kimi ayda iki
dəfə çıxarılması nəzərdə tutulan qəzetdə bütün dünyada yaşayan
azərbaycanlı türklərinin və Azərbaycan Respublikasının dünəni, bu günü
və sabahından bəhs edən yazılar dərc edilir.
“AZƏRBAYCAN TÜRKLƏRİ KÜLTÜR VƏ
DAYANIŞMA DƏRNƏYİ”
(İstambul)
“Azərbaycan türkləri Kültür və Dayanışma Dərnəyi” Türkiyədə
yaşayan soydaşlarımızın, o cümlədən Türkiyə ictimaiyyətinin Azərbaycan
mədəniyyətinə, incəsənətinə və ədəbiyyatına böyük marağına olan
tələbatına cavab olaraq yaranmışdır. Sədri Nihad Çətinqayadır. Dərnək
1989-cu ilin martından fəaliyyətə başlamışdır. Dərnəyin üzvləri
Azərbaycanın ictimai və
mədəni təşkilatları ilə
əlaqələrin
genişləndirilməsinə, milli mədəniyyətimizin təbliğinə xüsusi əhəmiyyət
verirlər. Dərnəyin Əhməd Əfənin redaktorluğu ilə nəşr etdiyi “Xəzər”
(“Azərbaycan türklərinin səsi”) qəzetində Azərbaycanda baş verən ictimai-
siyasi hadisələrə, demokratik hərəkata geniş yer verilir. Qəzetdə
Azərbaycana qarşı erməni təcavüzü ilə əlaqədar operativ və obyektiv
informasiyalar dərc olunur.
“AZAD AZƏRBAYCAN HƏMRƏYLİYİ QRUPU”
(Ankara)
Qardaş Türkiyə torpağında, məlum olduğu kimi, Azərbaycan milli
mədəniyyətini təbliğ edən, respublikamızdakı müasir ictimai-siyasi
vəziyyəti izləyən, öyrənən mədəniyyət mərkəzləri çoxdur. Bu vaxtlar
Türkiyədəki Azərbaycan Milli Mədəniyyət Mərkəzləri birləşərək qrup
halında da fəaliyyət göstərmişlər. Lakin sonradan bu qrup yenidən
parçalanmış, hər bir milli mədəniyyət mərkəzi və cəmiyyəti ayrı-ayrılıqda
fəaliyyətlərini davam etdirmişlər.
1993-cü ilin iyul ayında isə Ankara şəhərində “Azad Azərbaycan
həmrəylik qrupu” yenidən bərpa edilmişdir.
Qrupa Türkiyədə fəaliyyət göstərən ayrı-ayrı Azərbaycan
dərnəklərindən əlavə Türk ziyalılar cəmiyyəti, ticarət orqanları və birjalar
birliyi, yazıçılar birliyi, elm, ədəbiyyat, sənət əsərləri, məslək birliyi və b.
daxildir. Bütünlükdə “Azad Azərbaycan” həmrəylik qrupu 43 dərnək,
cəmiyyət və fondu birləşdirir.
Türkiyənin demək olar ki, bir çox tanınmış elm, mədəniyyət, sənət
xadimləri və işgüzar adamları Azərbaycan həmrəylik qrupunun üzvü
olmuşlar.
TÜRKMƏNİSTAN
“BALIQÇI” CƏMİYYƏTİ
(Krasnovodsk)
Türmənistanda xeyli azərbaycanlı yaşayır. Yalnıız Krasnovodsk
şəhərində üç minə yaxın soydaşımız məskunlaşmışdır. Krasnovodsk
şəhərində yaşayan azərbaycanlıları birləşdirmək məqsədilə şəhərin balıq
kombinatında işləyən soydaşlarımız 1992-ci ilin əvvəllərində “Balıqçı”
Çəmiyyətini yaratmışlar. Cəmiyyətin məqsədi Azərbaycandakı qaçqınlara,
yaralılara, müharibə zonasında vuruşan döyüşçülərə yardım etmək,
Azərbaycanda baş verən hadisələrlə bağlı doğru, düzgün məlumatı
Türkmənistanda yaşayan həmvətənlərimizə çatdırmaqdır.
UKRAYNA
“AZƏRBAYCAN MƏDƏNİYYƏT MƏRKƏZİ”
(Kiyev)
Kiyevdəki “Azərbaycan Mədəniyyət Mərkəzi” 1991-ci ildə
yaranmışdır. Mərkəzdə Kiyevdə yaşayan azərbaycanlı fəhlələr, tələbələr,
alimlər, hüquqşünaslar birləşmişlər. Sədri Səməd Yusifovdur. Mərkəzin
içərisində soydaşlarımızdan başqa digər millətlərin - avarların, tatarların,
yəhudilərin, rusların nümayəndələri də vardır. Mərkəz öz əsas məqsədini
müstəqil, demokratik quruluş yaratmaq uğrunda mübarizə aparan
Azərbaycan və Ukrayna respublikaları arasında iqtisadi, siyasi və mədəni
əlaqələri daha da möhkəmləndirməkdə və inkişaf etdirməkdə görür.
Mərkəzin üzvləri radio, televiziya və mətbuat vasitəsilə Azərbaycan
Respublikasında baş verən demokratik prosesləri, Ermənistanın
respublikamıza qarşı apardığı elan olunmamış müharibə haqqında həqiqəti
çatdırmağa çalışırlar. Mərkəzin vaxtaşırı keçirdiyi ictimai-siyasi və mədəni
tədbirlərdə soydaşlarımızdan başqa Kiyevdə yaşayan digər millətlərin
nümayəndələri də fəal iştirak edirlər.
Dostları ilə paylaş: |