Estetik və yaradıcı inkişaf. Estetik tərbiyə məktəbəqədər yaşlı uşaqlarda bədii
hisslərin və zövqün, bədii yaradıcılıq qabiliyyətlərinin, ətraf aləmdəki obyektləri müşahidə
və müzakirə etmək bacarığının inkişafını təmin edir. Təsviri fəaliyyətdə rənglər və
formaların yeni birləşmələri, quraşdırma prosesində müxtəlif modellərin qurulması,
hekayə və nağılın, musiqi fəaliyyətində melodiyanın və mahnıların dinlənilməsi, uşaq
musiqi alətlərində ifa, rəqs məktəbəqədər yaşlı uşaqların estetik zövqünün inkişafına
kömək edir. Yaradıcı əməli fəaliyyət prosesində uşaqda yaradıcı təxəyyül, təfəkkür,
ünsiyyət bacarıqları, digər insanların mövqeyini qəbul etmək bacarığı yaranır və inkişaf
edir. Estetik tərbiyə, həmçinin təbiətdə, ətraf mühitdə, insanların hərəkətlərində, geyimdə
gözəlliyi görmək bacarığı və yaradıcı qabiliyyətlərin formalaşmasına (musiqi duyumu,
təsviri fəaliyyət) imkan yaradır.
Sosial- emosional inkişaf. Məktəbəqədər yaşlı uşaqlarda sosial və emosional
keyfiyyətlər vəhdətdə inkişaf edir. Uşaq özünün emosional əhvalını məhz yaşadığı sosial
mühitin normaları əsasında tənzimləyir. Sosial-emosional inkişaf vasitəsilə uşaqlarda
insanlara qarşı müsbət münasibət, xeyirxahlıq, qayğıkeşlik, qarşılıqlı yardım, başqasının
dərdinə şərik olmaq, münaqişələrin həlli və s. kimi mənəvi keyfiyyətlər formalaşır. Uşaqlar
oyun, əmək və əməli fəaliyyətə, kollektivdə davranma qaydalarına dair ilkin bacarıqlara
yiyələnirlər. Bu dövrdə uşaqların böyüklərlə və yaşıdları ilə ilkin qarşılıqlı fəaliyyətinin
müxtəlif formaları yaranır. Ünsiyyətin köməyi ilə birgəfəaliyyətin müxtəlif növlərində
şəxsiyyətlərarası əlaqələr, böyüklərə hörmət, yaşıdlarına güzəşt, qarşılıqlı təsir və
qarşılıqlı anlaşma təmin olunur.
1.2. Müxtəlif fəaliyyət növləri üzrə uşaqların inkişafı Məktəbəqədər təhsil müəssisələrində uşaq inkişafının yaş mərhələsinə uyğun təşkil
edilən fəaliyyət növləri aşağıdakılardır:
