|
İİV-nin təyin olunması üçün test
İİV/HCV ko-infeksiyası qaraciyərin HCV tərəfindən zədələnmə
riskini artırır, HCV infeksiyasının terapiya müddətinin uzanmasına
və davamlı virusoloji cavaba nail olma ehtimalının aşağı düşməsinə
təsir edə bilir. Virus əleyhinə terapiyanın aparılması nəzərdə
tutulmuş bütün XCH-li xəstələr İİV-nin təyini testindən
keçməlidirlər.
Kəskin C hepatitli xəstələrin müalicəsi
Klinik cəhətdən kəskin ifadə olunmuş C virus hepatitli
pasiyentlərdə orqanizmin virusdan öz-özünə təmizlənməsi 67%
hallarda simptomların yaranmasından sonrakı 3-4 ay müddətində baş
verə bilər. Xəstəlik zəif, effektsiz T-hüceyrə cavabı zamanı xroniki
hal alır. Virusun yüksək mutasiya qabiliyyəti, həmçinin humoral
cavabı da çətinləşdirir və infeksiyanın xronikləşmə ehtimalını artırır.
Digər tərəfdən, virusun öz-özünə klirensi aktiv immun cavabla
əlaqədardır və sarılıqla keçən kəskin C hepatitli pasiyentlərin
simptomsuz pasiyentlərlə müqayisədə öz-özünə sağalma ehtimalı
daha böyükdür.
HCV-yə yoluxma faktı müəyyən edildiyi andan etibarən
pasiyentlərin 8-12 həftə ərzində müşahidə edilməsi zəruridir (D).
Əgər bu müddət ərzində öz-özünə sağalma qeyd olunmazsa, onda
VƏT-in təyin edilməsi vacibdir. Kəskin hepatit C-nin müalicəsi
infeksiyanın xronikləşməsinin qarşısının alınması baxımından çox
effektlidir.
VƏT peqilə olunmuş interferonlarla monoterapiya rejimində 24
həftə müddətində aparılır və pasiyentlərdə yüksək səviyyəli DVC
əldə olunmasına zəmin yaradır.
Kəskin C hepatitinin müalicə sxeminə ribavirinin əlavə edilməsi
DVC-yə nail olma tezliyini artırmır. Bəzi hallarda kombinə edilmiş
VƏT fərdi qaydada təyin oluna bilər.
Klinik protokol Azərbaycan Respublikası Səhiyyə Nazirliyinin
İctimai Səhiyyə və İslahatlar Mərkəzində hazırlanmışdır.
| 
