Uşaq, yenİyetmə və gənc Böyük Rəhbər həzrət Ayətullah Xameneinin baxışında



Yüklə 1,49 Mb.
səhifə8/18
tarix23.02.2017
ölçüsü1,49 Mb.
#9438
1   ...   4   5   6   7   8   9   10   11   ...   18

Qərbin xəstə gəncləri

Siz dünya gənclərinin vəziyyətindən xəbərdarsınız; rep qrupları, min cür əxlaq və düşüncə bəlaları. Dünya gəncləri doğrudan da min cür bəlalara düçar olmuşlar. İndi mövcud olan rep qruplarından və bu kimi insanlardan bizim dövrümüzdə də vardı. Bizim dövrümüzdə “The Beatles” adlı bir qrup məşhur idi. İndi eşitmişəm ki, qocalıblar... Psixoloji sıxıntı və problemlər onları belə işlərə sövq edirdi. İndi geriqalmış və ucqar ölkələrdə onları yamsılayanlar o yazıqların hansı xəstəliyə tutulduqlarını anlamırlar. Elə bilirlər bu, inkişafdır, halbuki tənəzzül və süqutdur.289


Asiya və Afrikanın gənc nəslini fəsada çəkmək

İslam ölkələrində gənc nəsli korlamaq üçün hərtərəfli proqramın icrasına başlandı. Bilirsiniz ki, müstəmləkə dövrü, yəni Qərb ölkələrinin Asiya və Afrika ölkələrinə soxulması təxminən iki yüz il qabaqdan başlandı. Onlar bilirdilər ki, bu vəziyyət davam etməyəcək və gənclər yetkinləşib mədəniyyətli və iradəli olsalar, əcnəbi və soyğunçuların boğazından su keçməyə qoymayacaqlar. Buna görə də gənc nəsli korlamaq üçün proqram hazırladılar.290


Gəncləri dəyərsiz işlərlə məşğul etmək

Bu gün İslam adlanan ölkələrin bəzisində bir neçə milyon gənc əllərini ciblərinə salıb fit çalır və dünyada baş verən böyük hadisələrə etinasız halda veyillənirlər. Bu gün bir neçə milyon gənc şəxsi həyata dair xırda məsələlərlə məşğuldurlar, özlərinin, insaniyyətin və xalqların şərəfinin düşmənlərinin nə etdiyini bilmirlər. Dünyada belə gənclər var.291


Gənc nəslin laqeydliyi

Hər bir cəmiyyətin cavanlarının necə düşünmələri və işləmələri o cəmiyyət üçün çox önəmlidir. Hər bir ölkənin cavan nəsli əslində həlledici qüvvədir. Əgər hər hansı bir ölkə maddi, elmi, sənaye, iqtisadi və müxtəlif sərvətlər cəhətindən tərəqqinin ən uca zirvəsində olsa belə, öz cavanlarını düzgün idarə edə bilməsə, gənc nəsil əldən çıxsa, heç şübhəsiz, çətin bir gələcəyi gözləməli olacaq.

Bu məsələ bu gün Qərb dünyasında, xüsusən də bəzi Qərb ölkələrində baş verməkdədir. Unutmaq lazım deyil ki, belə ictimai və tarixi tufanlar özünü tədricən göstərir. Diqqətsiz adamlar sona yaxınlaşmayınca nə baş verdiyini anlamırlar. Eqoist, şəxsi mənfəətini və öz cibini güdən adamlar da ya ümumiyyətlə, nə baş verdiyini anlamırlar, ya da anlayır, amma əhəmiyyətsiz yanaşırlar. Lakin hər bir cəmiyyətin uzaqgörən və qayğıkeş insanları gənc nəslin tələfolma təhlükəsini hiss edirlər. İndi bu hadisə baş vermişdir. Qərb cəmiyyətlərindəki uzaqgörən və qayğıkeş insanlar hansı faciənin baş verdiyinin fərqindədirlər. Cavanları çox ciddi şəkildə narkomaniya və bu kimi ictimai bəlalara düçar olmuşlar. Çoxları azdırıcı həyəcanların təsirindən adam öldürməyə, oğurluğa, soyğunçuluğa, cinayətə və çox çirkin şəhvətpərəstliyə üz tutmuşlar. Çoxları laqeyd olub seçkilərdə və ümumi tədbirlərdə iştirak etmirlər. Səbəbini soruşduqda deyirlər ki, bunun bizə əhəmiyyəti yoxdur. Onların laqeyd halı məhv olmaq əlamətlərindəndir.292
Gəncin üsyankarlığı

Mənəviyyatdan xəbərsiz, səmimi məhəbbətin ən az göründüyü, yalançı qayda-qanunların və zahiri gözəlliklərin baş aldığı sənaye sivilizasiyasının çox sıxıcı mühitində cavan üsyan edir. Bir mağazaya girişin səliqəli olmaqla, qalstuk taxmaqla və ya hər hansı bir xüsusi geyimlə şərtləndiyi bir cəmiyyətdə cavan, ənənələrə qarşı inadkarlığından, onlarla zidd olan ən pis formanı seçir və ümumi yerlərdə görünür. Bu, üsyan xarakteri daşıyan təbii reaksiyadır. O cavan filosof olduğundan belə etmir, xeyr, adi bir insandır. Lakin maddi və sənaye mədəniyyətinin insanın qanını sorduğu, ətini sümükdən ayırdığı mühitdə bir cavan öz etirazını necə göstərə bilər?! O, bu formada üsyan edir, lakin üçüncü dünyanın təqlidçi gənci bunun bir mod olduğunu düşünür və onu yamsılayır.293


Cəmiyyətin hərəkətinin ən əsas amili

İnkişaf amili hər şeydən çox insani iradənin sağlamlığı və ümumi məqsədə malik olmaqdır. Bu zaman hamı o məqsədi diqqətdə saxlayır, ürəkdən qəbul edir və qüdrətlə ona nail olmağa çalışır.

Bu iş cəmiyyətin bütün fərdlərindən gözlənilir. Lakin hər bir cəmiyyətdə bu mühüm hərəkətin ən əsas qüvvəsi gənclərdir. Baxın, gənc nəsil bu qədər əhəmiyyətlidir. Öz ölkəmizdə inqilab və İslam sayəsində, Allahla və Ona yaxın hər bir şeylə mənəvi əlaqəyə görə dəyərli bir gənc nəsil formalaşmışdır.294
Mədəni hücum

Bizim dəfələrlə təkidlə vurğuladığımız mədəni hücum məsələsi aydın bir həqiqətdir. Onu inkar etməklə hücumun özünü dəf edə bilmərik. Mədəni hücumu inkar etmək lazım deyil - bu var. Əmirəlmömininin (ə) sözü ilə desək, səngərdə səni yuxu aparmışsa, bu, qarşı səngərdəki düşmənin də yatması anlamına gəlmir;295 səni yuxu tutub, çalış yuxudan oyan. Biz milli və İslam mədəniyyətimizin özü kimi, mədəni inqilabın da düşmənlərin təhdidi altında olduğunu anlamalıyıq.

Biz aydın bir məsələni inkar etməməliyik. Universitetdə, universitet xaricində, hətta bizim kütləvi informasiya vasitələrimizdə, yazılan kitablarda, tərcümələrdə, şeirlərdə, dünyada zahirən bizimlə əlaqəsi olmayan və yəqin ki, mədəni işçilər kimi siz cənabların eşitdiyi mədəni proqramlarda - hər yerdə inqilab əleyhinə çox təhlükəli mədəni cəbhə açılmışdır.296
Mədəni mübadilə

Mədəni hücum mədəni mübadilədən fərqlənir. Mədəni mübadilə lazımdır. Heç bir xalq hər hansı bir sahədə, o cümlədən mədəni məsələlərdə başqa xalqlardan ehtiyacsız deyil. Tarixdə həmişə belə olub. Xalqlar get-gəl nəticəsində yaşayış tərzini, əxlaqı, elmi, geyimi, davranış qaydalarını, dili və dini bir-birindən öyrənmişlər. Dini mübadilə xalqların bir-biri ilə ən mühüm mübadiləsi kimi hətta iqtisadi mübadilələrdən də əhəmiyyətli olmuşdur. Bu mədəni mübadilələr çox zaman bir ölkənin dininin dəyişilməsi ilə nəticələnmişdir. Məsələn, İslamı Şərqi Asiya ölkələrinə, İndoneziyaya, Malayziyaya və Hindistan yarımadasının mühüm hissələrinə aparan ən böyük amil təbliğatçıların təbliğatı yox, İran xalqının get-gəli olub. İranlı tacir və səyyahların get-gəli nəticəsində bu gün Asiyanın bəlkə də ən böyük müsəlman xalqı olan indoneziyalılar İslamı qəbul etmişlər.

İslamı ilk dəfə oraya nə din təbliğatçıları apardı, nə də qılınc və döyüş. İslamı bu get-gəllər apardı. Bizim xalqımız da tarix boyu digər xalqlardan çox şey öyrənmişdir. Bu, bütün dünyada mədəni təlimlərin və mədəni həyatın yeni qalması üçün zəruri bir prosesdir. Bu, mədəni mübadilədir və yaxşıdır.

...Mədəni mübadilədə başqa xalqlardan bir şey götürmək istəyən xalq sevdiyi gözəl elementləri axtarır, məsələn, onlardan elm öyrənir. Fərz edin İran xalqı Avropaya gedir və görür ki, onlar çalışqan və təhlükədən qorxmaz xalqlardır. Əgər onlardan bunları öyrənsə, çox yaxşıdır. Uzaq Şərqə gedir, görür ki, oradakılar işdə vicdanlı və həvəskar, vaxtlarının qədrini bilən, nizam-intizamlı, mehriban və nəzakətli insanlardır. Əgər bunları öyrənsə və götürsə, çox yaxşıdır. Mədəni mübadilədə öyrənən xalq axtarıb öz mədəniyyətini təkmilləşdirəcək düzgün elementləri tapır və öyrənir; eynilə zəifləyib münasib qida axtaran insan kimi. O, münasib qida və dərman istifadə edir ki, sağlam olsun və bədəninin nöqsanı aradan qalxsın.

Mədəni hücuma məruz qalan xalqa verilən elementlər isə yaxşı deyil, pis elementlərdir. Avropalılar bizim ölkəyə mədəni hücuma keçdikdə, xalqımız arasında vaxtın qədrini bilməyi, cəsarəti, təhlükəli məsələlərdən qorxmazlığı, elmi diqqət və incəliyi yaymağa başlamadılar, təbliğat və tədqiqatla İran xalqının işdə və elmdə düzgün olmasına çalışmadılar. Onlar bizim ölkəmizə yalnız cinsi özbaşınalığı gətirdilər.

...Əgər mədəni mübadilədə başqa mədəniyyətdən bir şey öyrənən xalqı bazarda münasib qida və dərman axtaran bir adama bənzətsək, mədəni hücuma məruz qalan xalqı da acınacaqlı vəziyyətə düşmüş və əlindən bir şey gəlməyən xəstəyə oxşatmalıyıq. Bu zaman düşmən ona bir iynə vurur. Düşmənin vurduğu iynənin aqibəti də bəllidir. Bu onun özünün tapdığı, öz iradə və seçimi ilə qəbul etdiyi dərman kimi ola bilməz. Deməli, mədəni mübadilə bizim seçimimizlədir, mədəni hücum isə düşmənin seçimi ilə və bizim yerli mədəniyyətmizi məhv etmək üçün. Mədəni mübadilə yaxşıdır, mədəni hücum isə pisdir. Mədəni mübadilə bir xalqın qüdrətli dövründə baş verir, mədəni hücum isə zəif çağında.297


Ehtiras yolu ilə gəncləri dindən ayırmaq

...Növbə İslam ölkələrinə çatdıqda bu fikrə düşdülər ki, bu ölkələrin inkişaf etməkdə olan nəsillərini dindən ayırmalıdırlar. Bundan ötrü iki iş görülməli idi:

Biri cinsi məsələlərin yayılması və ona şəraitin yaradılması idi. İslam dini digər dinlərdən daha dəqiq olsa da, təkcə o yox, bütün dünya dinləri insanların cinsi özbaşınalığına qarşı çıxır. Dinlər bunun üçün qayda və hədd müəyyənləşdirib. Cinsi istəkləri məhdudlaşdırmadan insan ruhunun yetkinləşməsi mümkün deyil. İnsanın ehtirası heç bir sərhəd tanımasa, heyvan kimi olub insani tərəqqidən uzaq düşər. Buna görə də dinlər şəhvətpərəstliyə və cinsi özbaşınalığa müxalifdirlər.

Hər bir cəmiyyətdə dinlərlə sadə və asan mübarizə yolu cinsi özbaşınalığa rəvac verməkdir. İranda bu işə başladılar. Bu sahədə görülən ən mühüm işlərdən biri hicab qadağası idi. Başqa bir iş spirtli içkiləri yaymaq idi; onlar bu işi də gördülər. Başqa birisi qadınla kişi arasındakı əlaqə məhdudiyyətini aradan qaldırmaq idi. Bu, sınaqdan keçmiş işlərdəndir. Yeni elmi cihazlar və sivilizasiyanın inkişafı, məsələn, kinoteatrlar, radio, televiziya və sair vasitələr də onlara bu işləri asanlıqla görmək imkanı verirdi.298


Pozğun kanallar

İslam cəmiyyətlərinin, xüsusən də gənclərin sağlamlığını təhdid edən başqa bir bəla Qərbin mədəni hücumudur. Özü ilə pozğunluq gətirən səsli və görüntülü kanallar İslamın beynəlxalq düşmənlərinin hökmranlığına hərbi gəmi və təyyarələrdən daha pis və daha güclü şəkildə zəmin yaradır. Onlar yalançı dəyərləri yaymaqla müsəlmanların rəzilliyinə və əsarətinə səbəb olan qərbpərəstliyi təbliğ edirlər.299


Gənc nəslin tədricən tələf olması

Gənc nəsil düşmən vasitəsi ilə tədricən tələf olmaqdadır. Biz buna imkan verməməliyik. Biz gənc nəsli qorumalıyıq ki, müharibə olsa, müdafiə etsin; daxildə bir hadisə baş versə, iştirak etsin; elm və tədqiqat növbəsi çatdıqda dərs oxusun və özünü hazırlasın; gələcəkdən söhbət düşdükdə ona hazır olsun. Etimad və ümid amili olan bu gənc nəsil üzərində müxtəlif forma və üslublarla tədricən işləyirlər. Bu fəaliyyətlər əsasən mədəni istiqamətdədir. Düzdür, gəncləri fəsada çəkən mərkəzlər var. Bu, qeyri-mədəni və praktik tərəfidir. Lakin hamısından təhlükəli olan gənclərin zehni və düşüncəsidir. Bununla məşğul olmaq lazımdır.300


Mədəni qətliam

Düşmən yanlış mədəniyyəti, fəsadı və pozğunluğu yaymaqla gənclərimizi bizdən almaq istəyir. Mədəni baxımdan düşmənin gördüyü iş təkcə mədəni hücum yox, hətta demək olar ki, mədəni qırğın, qarət və qətliamdır. Bu gün düşmən bizə qarşı bu işləri görür.301


Qərb mədəniyyətinin əsas təməlləri

Qərb mədəniyyəti insanın fəsadına hesablanmış, bəşəri dəyərlərə zidd, güc sahiblərinin və qüdrət imperatorlarının əlində alət olmuş bir mədəniyyətdir. Bu mədəniyyətlə Adəm övladlarını bütün insani dəyərlərdən ayırmaq, insanları əxlaqsız, itaətkar, təslimçi, Allahdan və mənəviyyatdan xəbərsiz məxluqlara çevirmək istəyirlər. Onların maraqları bu mədəniyyəti yaymaqla təmin olunur. Çılpaqlıq mədəniyyəti və qadınla kişinin qeyd-şərtsiz əlaqəsi Qərb mədəniyyətinin əsaslarındandır, ilk gündən insanları fəsadı və bəşəriyyətin humanitar dəyərlərdən uzaqlaşdırmağa hesablanıb. Onların bəşəriyyətə ürəkləri yanmır.302


Andalus faciəsinin təkrarı

Mədəni hücumun yollarından biri ötən əsrlərdə Andalusda olduğu kimi, mömin gəncləri imana təəssüblü bağlılıqdan daşındırmaqdır. Orada gəncləri fəsada, ehtiraslara və şərabxorluğa qərq etdilər. Hal-hazırda bu işlər görülməkdədir.303


Mədəni hücumu anlamaq

Bu mədəni hücum siz gənclər tərəfindən düzgün duyulmalı və dərk olunmalıdır. Çünki bu hücumun hədəflərindən biri özünüzsünüz. Sizi hədəf seçmişlər.304


Qərb mədəniyyətinin inkarı

Qərbi inkar etmək - onun texnologiyasını, elmini, inkişafını və təcrübələrini inkar etmək demək deyil. Heç bir ağıllı insan bunu etməz. Qərbi inkar etmək – onun istismarçılığını inkar etməkdir; istər siyasi istismarçılıq olsun, istər iqtisadi və yaxud mədəni. Mən bu qısa vaxt ərzində Qərbin mədəni istismarçılığı haqda bir neçə cümlə demək istəyirəm. Bu, sizin üçün faydalı ola bilər.

Qərb mədəniyyəti gözəllik və çirkinliklər məcmusundan ibarətdir. Heç kim Qərb mədəniyyətinin bütünlüklə çirkin olduğunu deyə bilməz. Xeyr! Bütün mədəniyyətlər kimi, o da gözəl cəhətlərdən xali deyil. Heç kim öz qapılarını bu və ya digər əcnəbi mədəniyyətin üzünə mütləq şəkildə bağlamaq istəməz. Qərb mədəniyyəti Şərq mədəniyyəti və dünyanın digər mədəniyyətləri kimi, həm yaxşı, həm də pis elementlərdən təşkil olunub. Ağıllı bir xalq və toplum yaxşı elementləri götürüb öz mədəniyyətinə əlavə edər, onunla öz mədəniyyətini zənginləşdirər, pis elementləri isə rədd edər. Dediyim kimi, bu məsələdə Avropa, Qərb, Amerika, Latın Amerikası, Afrika və yaxud Yapon mədəniyyətləri arasında heç bir fərq yoxdur - hamısı bərabərdir. Biz hər hansı bir mədəniyyətlə rastlaşdıqda, təbii olaraq bacardığımız qədər onun gözəlliklərini götürməli, bizə münasib olmayan pis və zərərli cəhətləri və bizim baxışımızdakı gözəlliklərlə ziddiyyət təşkil edənləri rədd etməliyik. Bu, ümumi bir prinsipdir. Qərb mədəniyyəti haqda isə mühüm bir məqam var, sizin buna diqqət yetirmənizi istəyirəm. Qərbin, yəni avropalıların mədəniyyətinin, bizim bildiyimiz qədər, başqa mədəniyyətlərdə olmayan bir eybi var. Bu, hakimolma hissidir. Bu, qəti humanitar, coğrafi və tarixi dəlillərə əsaslanır. Onlar dünyada elmi üstünlüyə malik olan kimi, on doqquzuncu əsrdə birbaşa müstəmləkəçilik formasını alan siyasi və iqtisadi hökmranlıqları ilə öz mədəniyyətlərini yeritməyə başladılar, xalqların mədəniyyətinə qarşı mübarizə apardılar. Bu, pis haldır. Hər hansı bir xalqın başqa bir ölkəyə öz mədəniyyətini qəbul etdirməyə qalxması əsla qəbuledilməzdir. Əgər çox yaxşı da olsa, xalq ona sırınan mədəniyyəti qəbul etməz. Siz yəqin ki, öz meylinizlə yediyiniz qatıq-çörəyi zorla ağzınıza qoyulan kabab-plovdan üstün tutarsınız. Hər hansı bir iş zorla olduqda, güc göstərildikdə, amiranə və təkəbbürlü şəkildə yeridildikdə, hər bir xalq ona qarşı çıxar. Bu, belə də olmalıdır. Misal üçün, qalstuk Qərbə aid bir şeydir. Qərblilər bunu istəyirlər, sevirlər, öz ənənələrinə uyğundur. Siz isə başqa bir ölkənin vətəndaşı ola-ola, əgər təsadüfən kostyum geyinməyi seçmisinizsə və qalstuk taxmırsınızsa, mədəniyyətsizmi hesab olunmalısınız?! Nə üçün? Bu sizin mədəniyyətinizdir, mənim günahım nədir?! Əgər kostyum geyinmisinizsə, bant və ya qalstuk da taxmalısınız, yoxsa filan məclisdə iştirak edə bilməzsiniz, mədəniyyətsiz, nəzakətsiz və səliqəsiz adam sayılacaqsınız! Bu, Qərb mədəniyyətinin zorla qəbul etdirilməsidir. Qərbli qadının öz adət-ənənəsi var. Onların qadın məsələsinə, qadının geyiminə, kişilərlə əlaqəsinə və cəmiyyətdə roluna dair xüsusi normaları var. İndi bunların yaxşı, ya pis olmasından danışmırıq. Məsələ burasındadır ki, onlar bu mədəniyyəti zorla dünyanın digər xalqlarına qəbul etdirmək istəyirlər. Bu, Qərb mədəniyyətinin pis xüsusiyyətidir.

Mən bir dəfə bir misal vurub dedim ki, bir var özünüz öz seçiminizlə yüksək kalorili bir qidanı, yaxud hər hansı dərmanı qəbul edəsiniz, bir də var sizi huşsuz edib, yatıra, yaxud əl-ayağınızı bağlayıb sizə bir ampul vuralar. Fəsadlı rejim və ölkə başçılarının vasitəsi ilə Qərb mədəniyyətini xalqlara köçürməyə çalışmışlar. İran xalqına etdiklərinə görə Allah azğın Pəhləvi rejiminin günahından keçməsin! Onlar da belə idilər. Onlar müxtəlif üsul və yollarla Qərb mədəniyyətini ölkəmizə hakim etməyə çalışdılar, bundan ötrü İran xalqını, milli mədəniyyəti, milli inamları təhqir etdilər.

Qacarlar sülaləsinin sonlarında qərblilərin İrana hücumu başlandı, Pəhləvilərin dövründə isə zirvə həddinə çatdı. O dövrdə yetişənlər İran xalqını özünü idarə etməyə, işləməyə, bir şey düzəltməyə, dünyaya nə isə təqdim etməyə və yaxud əldə edilmiş məlumatları artırmağa layiq bilmirdilər. Nə üçün belə idi? Bu, xalqın mədəniyyətinin, milli kimliyinin təhqirinə və əcnəbi mədəniyyətin qəbul etdirilməsinə görə idi. Milli kimlik mədəniyyətlə formalaşır. Hər bir xalqın kimliyi onun mədəniyyətidir. Bunu yaralamaq olmaz. İran xalqının Qərb mədəniyyətinə qarşı çıxması buna görədir. Qərb mədəniyyətinin gözəllikləri də var. Onların mədəniyyətinin gözəlliklərini götürməyin eybi yoxdur, amma öncə o gözəlliklərin nədən ibarət olduğu müzakirə mövzusu olmalıdır.305
İmam Xomeynini düzgün tanımaq

Bizim ölkəmizin sabahının ümidi olan gənc və yeniyetmə nəslin mədəni-ideoloji ehtiyacları əsasən, aşağıdakılardan ibarətdir:

Etiqadi və dini təməlləri möhkəmlətmək, İslamın və Quranın elmi əsasları ilə tanış olmaq, ölkənin tarixindən və xalqın nailiyyətlərindən, xüsusən də günümüzə yaxın dövrlərdəki nailiyyətlərindən xəbərdar olmaq, müasir tarixin uca zirvəsi olan İmam Xomeynini, onun parlaq siyasi düşüncələrini və böyük inqilab hərəkətinin təməllərini düzgün tanımaq, xalqımızın inqilab və müqəddəs müdafiə dövründə dünyaya verdiyi dərsə görə qürur duymaq.306
İmam Xomeyni mifi

Uzun zaman bu böyük insanın bir şagirdi və ardıcılı olaraq hiss etdiyim, gördüyüm və bütün vücudumla gəldiyim qənaəti siz əzizlərlə, xüsusən də gənclərlə bölüşmək istəyirəm. İmam haqda çox danışmışıq. Hamı – dost və düşmənlər, iranlı və qeyri-iranlılar, müsəlman və qeyri-müsəlmanlar bu böyük insanı tərifləyiblər. Bunlara dair sözümüz yoxdur. Onun əzəməti, məqamı və ucalığı hamıya aydındır. Lakin bu ümumi bir sözdür. Mən düşünürəm ki, bu böyük insanın bizim qarşımızda açdığı fəxr və şərəf yolu ilə bu gün qüdrətlə və həvəslə gedən gənc nəslimiz öz imamı haqda daha artıq bilmək istəyir. Mən öz təsəvvürlərimi deyəcəyəm. Yəni təxminən otuz il müddətində imamı yaxından tanımışam və hər bir dövrdə bu əzəmətli şəxsiyyətin bir cəhətini müşahidə etmişəm. Mənim gənclik dövrümdən onun vəfatına qədər sürən bu 31 ilin 14 ilində o, sürgündə olub, biz zahirən ondan uzaq olmuşuq, lakin onda da imamın yolunda idik, ondan ayrılmamışdıq, həmin 14 ildə də əslində, imamla idik.

Siz əzizlərə bir məsələni deyim. İmamın şagirdləri və imamı tanıyanlar onu olduqca çox sevsələr də, imam haqda deyilənlər sevgidən qaynaqlanmır. Sevginin də qaynağı imamda olan həmin xüsusiyyətlər idi. İkinci məsələ budur ki, bu şəxsiyyət öz üstün cəhətlərini kiməsə göstərməyə əsla can atmır, çalışmırdı. Nə zaman və harada şəriət vəzifəsi onu bir hərəkətə vadar edirdisə, şəxsiyyətinin bir cəhəti aşkara çıxırdı.

Mən 1958-ci ildən başlayıram. Həmin ildə mənim özüm Quma getdim və imamı birinci dəfə yaxından gördüm. Ondan öncə Məşhəddə eşitmişdik ki, Qumda gənclərin bəyəndiyi görkəmli və böyük bir müəllim var. Quma daxil olan gənc tələbə müəllim axtarır. Elm hövzələrində müəllim seçimi məcburi deyil, hər bir tələbə öz zövqünə uyğun olan və bəyəndiyi müəllimi seçir. İlk anda gənc və həvəskar tələbələri özünə cəlb edən müəllim, şagirdlərinin arasında Hacıağa Ruhullah kimi tanınan kişi idi. Əxlaqlı, dərs oxuyan və həvəskar gənclər onun dərsinə toplaşmışdılar. Biz belə bir şəraitdə Quma daxil olduq.

O, fiqh və üsulda mütəxəssis və elmi yenilikçi idi. Mən ondan öncə Məşhəddə böyük bir müəllimi, yəni görkəmli fəqihlərdən olan mərhum Ayətullah Milanini görmüşdüm. Qumda elmi hövzənin rəisi, həm də imamın müəllim olan mərhum Ayətullah Bürucerdi də vardı, digər böyüklər də var idilər. Lakin həvəskar, çalışqan və istedadlı gənclər üçün maraqlı və cəlbedici dərs imamın fiqh və üsul dərsi idi. Yavaş-yavaş köhnə tələbələrdən eşitdik ki, bu insan həm də böyük filosofdur, onun fəlsəfə dərsi Qumda birinci fəlsəfə dərsi olmuşdur, lakin indi fiqhi tədris etməyi tərcih edir. Sonra eşitdik ki, bu insan həm də əxlaq müəllimi olmuşdur. Bəzi şəxslər onun əxlaq dərsində iştirak edirdilər və o, gənclərdə əxlaqi dəyərləri gücləndirməyə çalışırdı. İllər uzunu dərslərin arasında biz bunu yaxından gördük. Lakin buraya qədər, daxili naməlum xüsuiyyətlərlə dolu olan bu böyük şəxsiyyət o zaman xalqın əksəriyyəti üçün yalnız bir alim, şagird yetişdirən müəllim, tələbə və şagirdlərin əxlaq ustadı kimi tanınırdı. 1961-ci ildə təqlid müctəhidi olan Ayətullah Bürucerdi vəfat etdi. Təqlid müctəhidliyi irəli sürülən böyük alimlər vardı. Hər birinin dostları onların adlarını çəkirdilər. Bu zaman bu kişi üçün verdiyi əxlaq dərsinin təkcə dildə və digərlərinə öyrətməkdən ibarət olmadığını sübut etməyə şərait yarandı. Onun özü nəfsi paklama dərslərinə ilk əməl edən olmuşdur. Hamı gördü, anladı və təsdiq etdi ki, bu kişi məqama, şöhrətpərəstliyə, hətta təqlid müctəhidliyindən ibarət olan ruhani və mənəvi bir rəhbərliyə də arxa çevirir, vəzifə, dərəcə və şəxsiyyət üçün əsla çalışmır, hətta digərləri çalışmaq istədikdə də bacardığı qədər mane olur. Mərhum Ayətullah Bürucerdinin vəfatından təxminən il yarım ötdükdən sonra İslam hərəkatı başlandı, 1962-ci ilin sonlarında bu şəxsiyyətin başqa bir cəhəti aşkar oldu. Bu, sayıqlıq, uzaqgörənlik və adətən diqqətdən kənarda qalan məsələlərə diqqət, digər tərəfdən isə dini qeyrət idi. O zaman dövlətin qərar qəbul edərək seçilmiş şəxsdə müsəlman olmaq şərtini və Qurana andı götürdüyünü çoxları eşitdilər, lakin bunun əhəmiyyətinə çox da diqqət yetirmədilər; halbuki böyük əhəmiyyətə malik idi. Səbəbi bu idi ki, Milli Şura Məclisi təyinatlı bir parlament olsa da, onu özləri təşkil etsələr də, yalnız özlərinin qəbul etdiyi namizədlər seçilsə və əslində xalqın seçim haqqı olmasa da, o rejim birliklərə aid qərarları və bu müsəlmanlıq şərtini həmin parlament zamanı irəli sürməyə cürət etmədi, reaksiyadan qorxub, parlament olmayan zamana saxladılar. O zaman parlamenti buraxmışdılar, parlament yox idi, bunu qapalı şəraitdə qəbul etdilər. Bu, məsələnin arxasında çoxlu plan və məqsədlərin durduğunu göstərirdi. Bunu heç kəs anlamırdı, lakin imam anladı və etirazını bildirdi. Din qeyrəti onu bu məsələdə önə keçməyə və zahirən kiçik olan bu antiislam əməli ilə mübarizəyə başlamağa vadar etdi.

Burada mühüm bir məsələ var: Böyük İmam hətta mübarizə məsələsində də önə keçmək istəmədi. Onun özü bizə danışırdı ki, hərəkat başlayan zaman həmin dövrün məşhur təqlid müctəhidlərindən və onunla bir səviyyədə olan alimlərdən biri ilə birgə mərhum Ayətullah Hairinin evində söhbət etmişdilər. Ona demişdilər ki, siz qabağa düşün, biz də arxanızca hərəkət edəcəyik. İmamın məqsədi bu idi ki, vəzifə yerinə yetirilsin, üzərində hiss etdiyi vacib əməli yerinə yetirsin, irəliyə keçmək barədə fikirləşmirdi. Əlbəttə, digərlərində bu işə qoşulmaq üçün yetərli bacarıq və cürət yox idi, onlar imama çatmazdılar. Bu hərəkatın rəhbərliyi təbii şəkildə imamın üzərinə düşmüşdü. O bu mübarizəyə başladı və xalqa arxalandı. O zamana qədər elmi hövzə böyüklərindən və təqlid müctəhidlərindən heç kəs güman etməzdi ki, elə qapalı bir dövrdə dini hərəkət bu şəkildə xalqın dəstəyini qazana bilsin. İmam isə dedi ki, mən bu xalqın dəstəyi ilə hərəkət edirəm, xalqı Qumun çölünə çağıraram. O bilirdi ki, xalqı çağırsa, bütün İrandan toplaşıb, ovaxtkı hökumət və mənfur rejim üçün qarşısıalınmaz və əzəmətli bir izdiham yaradarlar.

Burada bu insanın şəxsiyyətinin yeni bir cəhəti aşkara çıxdı: rəhbərlik qabiliyyəti, siyasi cəsarət, düşmənin işlərinin xırdalıqlarından xəbərdar olmaq, düşmənlərin məqsədlərinə qarşı sayıqlıq. Bu cəhət əməldə göründü. 1963-cü il, yəni mübarizənin ikinci ili çatdı. Bu il kəskin tədbirlər, təzyiqlər və qətllər ili idi. Orada imam İran xalqının ümid səmasındakı bir günəş kimi parladı, fədakar bir insan kimi meydana çıxdı, bir vulkan kimi od püskürdü. Bütün dünyaya məxsus adam, bir vətən adamı və İslam adamı üçün lazım olan bütün hisslər onda toplanmışdı: lazımi şücaəti var, xalqı səfərbər etmək qabiliyyəti var, açıq mövqeyi var. İstər komandosların Feyziyyə mədrəsəsinə və Qum Elm Hövzəsinə hücum etdiyi 63-cü ilin yazında, istərsə də imamın əzəmətinin göründüyü 63-cü ilin yayında İran xalqı qəfildən hiss etdi ki, arxası, dayağı, ümid bəsləyə biləcəyi bir əzəmətli zirvə var. İmam 15 xordadda (5 iyunda) səhnədə belə göründü.

Bu hadisədən sonra həbs, sürgün və təzyiqlər başlandı. İmam o zaman gənc deyildi. Gənc olduğumuzdan bizim üçün həbsə düşmək və çətin hadisələr çox da ağır gəlmirdi, daha çox əyləncəyə bənzəyirdi. Lakin imam mübarizənin başlandığı zaman 63 yaşında idi. Bu kişi 63 yaşında öz hissləri ilə bir xalqın hisslərini coşdura bilirdi. O yaşda olan bir şəxs üçün həbsə düşmək və sürgün olunmaq asan iş deyildi. Lakin onda bu fədakarlıq və təhlükələri qəbul etmək duyğusu aşkarlandı. Bu da yeni bir cəhət idi. Yəni böyük amalları və dini vəzifəsi yolunda heç bir problem ona mane ola bilmirdi. Bu, imamın 14 ilə qədər əvvəlcə Türkiyəyə, sonra isə İraqa sürgünü ilə nəticələndi.

İmamın sürgün dövründə zamanımızın həqiqətən müstəsna və bənzərsiz adamının şəxsiyyətinin yeni bir cəhəti aşkara çıxdı. İnsan böyük şəxsiyyətlərin həyatında nadir hallarda bu cəhətlərin bəzisini müşahidə edir. Əvvəla o bir siyasi texnoloq və nəzəriyyəçi mövqeyində durub heç bir real anoloqu olmayan yeni bir hökumətin və quruluşun layihəsini hazırlayır. O, müasir dünyanın ehtiyaclarını və dünyada irəli sürülən məsələləri nəzərə alıb bir İslam quruluşu təqdim edir və bunların hamısı o quruluşun layihəsini təşkil edir. İkincisi isə bu insan İranda olmasa da, 14 il ərzində uzaqdan İrandakı İslam mübarizəsinə və İslam hərəkatına sözün həqiqi mənasında rəhbərlik etdi. Bu 14 ildə, xüsusən də son bir neçə ildə - yəni 70-71-ci illərdən 75-76-cı illərə qədər çoxlu şiddət və repressiya vardı. Siyasi və qeyri-siyasi olan müxtəlif gizli mübariz qruplar, qruplaşmalar və siyasi partiyalar yaranır, hamısı rejimin təzyiqləri altında dağılıb gedir, yaxud təsirsiz olurdu. Onların bəzilərinin beynəlxalq siyasi dayaqları da vardı, Şərq və Qərb blokuna, xüsusən də Şərq blokuna bağlı idilər, oradan idarə olunur və yardım alırdılar. Lakin imamın hərəkatı partiya təşkilatına söykənmirdi. Ölkə daxilində imamın heç bir partiyası yox idi. Onun şagirdləri, dostları, fikri ilə tanış olanlar və xalq vardı. İmam da bəyanat yayanda xüsusi dostlarına və tanışlarına müraciət etmirdi. O bütün xalqa müraciət edirdi. O, xalqla və kütlələrlə danışırdı, onları yönəldirdi. 14-15 il boyunca uzaqdan İslam fikrinin və İslam hərəkatının bu mənbəyini əvvəlcə beyinlərdə dərinləşdirə, sonra isə cəmiyyət səviyyəsində genişləndirə bildi, gənclərin qəlbini, beynini və imanını ona yönəltdi və belə əzəmətli bir inqilab üçün şərait yarandı. Çoxları ölkə daxilində böyük, ixlaslı və fədakar işlər görürdülər. Lakin əgər imamın mərkəzliyi olmasaydı, bu işlərin heç biri olmayacaqdı, hamısı məğlubiyyətə uğrayacaqdı, bu insanların hamısı yorulacaqdılar. Yorulmayan şəxs o idi, digərləri də ondan güc və qüvvə alırdılar. Sonra 14 il müddətində bir inqilabi hərəkətin və böyük bir hərəkatın rəhbərliyi və onu bütün dolanbaclardan keçirmək işi onun vasitəsi ilə baş tutdu. Elə oldu ki, qeyri-dini və antidin fikirlər təcrid olundu, kənara qovuldu, İslam fikri, bu məntiqli, möhkəm və güclü təfəkkür digər fikirlər üzərində öz qələbəsini günbəgün möhkəmləndirdi. Bütün mühüm hadisələrdə imamın rolu duyulurdu. 1968-ci ildə imam fiqhin mərkəzi olan Nəcəfdə güclü fiqh dəlillərinə əsaslanan Fəqih hakimiyyəti nəzəriyyəsini irəli sürdü.

Əlbəttə, Fəqih hakimiyyəti prinsipi Şiə fiqhinin qəti məsələlərindəndir. İndi bəzi savadsızlar deyirlər ki, Fəqih hakimiyyəti nəzəriyyəsini imam irəli sürdü, digər alimlər onu qəbul etmirdilər. Bu, məlumatsızlıqdan irəli gəlir. Fəqihlərin sözləri ilə tanış olan şəxs bilir ki, Fəqih hakimiyyəti məsələsi şiə fiqhində aydın məsələlərdəndir. İmam bu fikri bugünkü dünyada, müasir siyasi məktəblərdə mövcud olan yeni və əzəmətli üfüqlərə əsasən tənzim edib, köklü, möhkəm, dəlilli və keyfiyyətli formaya saldı; elə şəklə saldı ki, günün siyasi məsələləri, siyasi məktəbləri ilə tanış olan və nəzər sahibi olan hər bir insan üçün dərk və qəbulediləsi olsun.

Mənim əzizlərim! Həmin 14 ildə, xüsusən də son illərdə İranda İslam mübarizləri tənhalıq hiss etmirdilər, imamın həmişə onlarla əlaqədə olduğunu duyurdular. Övladının vəfatı zamanı bu əzəmətli şəxsiyyətin başqa bir cəhəti aşkara çıxdı. Çoxları böyükdürlər, alimdirlər, şücaətlidirlər, lakin bu əzəmətin daxili hisslərinə və ürəklərinin dərinliyinə qədər uzandığı şəxslər çox deyillər. Dəyərli və alim övladı dünyadan köçərkən - onun oğlu da əslində dəyərli bir oğul, görkəmli alim və gələcəyin ümidi idi - səksənə yaxın yaşı olan qoca bir kişidən eşidilən cümlə bu oldu: “Müstafanın ölümü Allahın gizli mərhəmətlərindəndir”. O bunu ilahi mehribanlıq və Allahın gizli lütfü sayır, Tanrının ona mərhəmət göstərməsi kimi qəbul edirdi; özü də gizli mərhəmət. Görün bunun üçün insan necə əzəmətli olmalıdır. İnqilab dövründə bu böyük insanın belə çətinlik və əziyyət çəkməsinin və möhkəm dağ kimi dözməsinin kökü həmin mənəvi əzəmətdir; bir əzizinin ölümü zamanı belə rəftar edir. Sonra da onun İraqdan sürgün edilib Küveytə, sonra isə Fransaya mühacirəti başlandı. Buyurdu ki, əgər mənə hansısa bir ölkədə qalmaq icazəsi verməsələr, bir-bir hava limanlarını gəzib bütün dünyaya sözümü çatdıracağam. O əzəmət, şücaət, dözümlülük, misilsiz möhkəmlik, ilahi və peyğəmbərcəsinə rəhbərlik qabiliyyəti burada yenə özünü göstərdi. Bu da onun şəxsiyyətinin yeni bir cəhəti idi. Sonra onun İrana gəlişi, bəlli hadisələrlə qarşılaşması və İslam Respublikası dövlətini qurması baş verdi.

İslam quruluşundan sonrakı dövrdə imamın şəxsiyyətinin müşahidə olunan cəhətləri, mənim fikrimcə, əvvəl görünəndən dəfələrlə əhəmiyyətli və böyük idi. Bu dəyərli və üstün şəxsiyyət bu dövrdə iki cəhətlə və iki simada müşahidə olunur: hakimiyyət zamanı bir sima rəhbər, biri isə zahid və arif simasıdır. Bu iki xüsusiyyətin sintezi yalnız Davud kimi, Süleyman kimi, son Peyğəmbər kimi bir insanda müşahidə oluna bilər. Bunlar İran xalqının uzun illər boyu bütün vücudu ilə dərk etdiyi həqiqətlərdir. Biz də yaxından şahid olduq və gördük. İslam və Quran tərbiyəsi budur. İmam hamını belə bir məqama dəvət edirdi. İslam quruluşunu belə, özü kimi insanlar yetişdirmək üçün istəyirdi.

Bir dövlət başçısı və rəhbər məqamında olan Böyük İmam sayıq, qorxmaz, ağıllı, kreativ və genişqəlbli idi. Ağır təzyiqlər onun qarşısında əhəmiyyətsiz bir şey sayılırdı. Onu sındıracaq, kiçildəcək heç bir ağır hadisə yox idi. İmam özünün onillik rəhbərliyi dövründə qarşıya çıxan və olduqca çox olan acı və çətin hadisələrin hamısından böyük idi. Bu hadisələrin heç biri – müharibə, ABŞ-ın hücumu, çevriliş planları, dəhşətli terrorlar, iqtisadi sanksiyalar, böyük və nəhəng işlər bu əzəmətli insanı zəiflədə və məğlub edə bilmədi. O bunların hamısından güclü və böyük idi. O, xalqa inanırdı, xalqın səsini həqiqətən, vacib sayırdı. Mən ikinci xütbədə bu barədə bir qədər danışacağam. O, xalqı səmimi-qəlbdən sevirdi, xalqa eşq bəsləyirdi. Dünyanın müxtəlif rəhbərlərinin üstün xüsusiyyətlərinin əksəri imamda var idi. O həm ağıllı, həm uzaqgörən, həm ehtiyatlı idi, həm düşməni tanıyırdı, həm dosta etimad göstərirdi, həm də düşmənə vurduğu zərbə qətiyyətli olurdu. Belə həssas və əhəmiyyətli bir məqamda vəzifəsini yerinə yetirmək, Allahını və vicdanını razı salmaq üçün bir insana lazım olan bütün xüsusiyyətlər bu kişidə cəm olmuşdu.

İmam xalqa etimad bəsləyirdi. İnqilab qələbə çalanda imam elan edə bilərdi ki, bizim quruluşumuz İslam Respublikası quruluşudur. Xalqın fikrini soruşmaya bilərdi, heç kəs də etiraz etməzdi. Lakin bunu etmədi, referendum keçirib xalqın fikrini soruşdu. Xalq da İslam Respublikasını istədiyini bildirdi və bu dövlət quruldu. İmam bir konstitusiya təqdim edə bilərdi, xalqın hamısı, yaxud böyük əksəriyyəti də şübhəsiz, qəbul edərdilər. Bir qrupu təyin edib konstitusiyanı yazmalarını istəyərdi, heç kəs də etiraz etməzdi. Lakin imam bu işi görmədi, Dini Ekspertlər Məclisinə seçki keçirdi. O bu işin tez baş tutmasına tələsirdi də. Dünya inqilablarında - çoxu inqilab deyil, çevrilişdir - hakimiyyətə gələnlər bir-iki il fürsət alıb deyirlər ki, seçkilərə hazırlıq üçün bu müddət başa çatmalıdır. Çox zaman həmin müddəti uzadırlar da. İmam isə inqilabın qələbəsindən iki ay ötməmiş ilk seçkiləri – yəni İslam Respublikasının referendumunu keçirdi, bir-iki aydan sonra konstitusiya ekspertləri seçildilər, bir neçə aydan sonra prezident seçkiləri keçirildi, daha bir neçə aydan sonra parlament seçkiləri keçirildi. İnqilabın birinci ilində imam müxtəlif məsələlərdə dörd dəfə xalqın rəyini soruşdu: quruluşun özü, konstitusiya, - bir dəfə konstitusiyanın ekspertləri seçildilər, bir dəfə də konstitusiyanın özü üçün referendum keçirildi - prezident və parlament üçün.

İmam sözün həqiqi mənasında xalqın fikrinə, iradə və istəyinin cəmləşdiyi məsələyə güvənirdi. Əlbəttə, belə yerlərdə heç zaman işin idarəsini siyasətbazların öhdəsinə buraxmırdı. Xalq siyasətbazlardan, siyasət iddiaçılarından, xalqın tərəfdarlığını iddia edənlərdən fərqlidir. İmam xalqa etimad göstərirdi. Çoxlu qrup, partiya, iddiaçı, siyasətbaz və partiyabaz vardı. İmamın onlarla işi yox idi, onlara üz də vermirdi ki, gəlib artıq imtiyazlar istəsinlər, xalqın adından danışsınlar və xalqın əvəzinə qərar çıxarsınlar. O, xalqın səsinə hörmət edirdi.

Müharibə başladı. O, silahlı qüvvələrin Ali Baş Komandanı kimi göründü. İqtisadi sanksiya zamanı hökumətin mənəvi himayədarı idi. İnqilabın əvvəlində imam yoxsulları müdafiə üçün çoxlu göstərişlər verdi, çoxlu işlər görüldü, xalqa kömək göstərmək üçün Quruculuq Cihadı, Mənzil Fondu, İmdad Komitəsi, Məhrum və Əlillər Fondu, 15 Xordad Fondu kimi qurumlar yaradıldı. İmam üçün hakimiyyətdə və ölkə idarəsində əsas məsələ bu idi. Bu, imamın qüdrətli və iradəli rəhbərlik cəhəti idi; elə bir insan ki, müharibə başlasa, yaxud sülh olsa, qərar verə bilir, ölkənin idarəsi və düşmənlərlə müharibə üçün qərar çıxarır. Özünün şəxsi həyatına baxdıqda isə zahid, arif və dünyadan uzaq bir insan kimi görünür. Sözsüz ki, məqsəd pis dünyadır. Onun özü deyirdi ki, pis dünya sizin daxilinizdə olandır. Bu təbiət – yer, ağac, səma, ixtiralar və sair amillər pis deyil, Allahın nemətləridir. Bunları abadlaşdırmaq lazımdır. Pis dünya sənin daxilində olan xudpəsəndlik, artıqtamahlıq və bağlılıq hissidir. İmam bu pis dünyadan tamamilə uzaq idi. O özünə heç bir şey istəmirdi. İmam üçün ən əziz insan onun oğlu mərhum Hacı Əhməd ağa idi. Biz bunu dəfələrlə imamdan eşitmişdik. Onillik hakimiyyətində və böyük rəhbərlik dövründə bu yeganə oğlu üçün bir ev almadı. Biz dəfələrlə gedib görmüşdük ki, imamın ən əziz adamı onun evindəki hüseyniyyənin arxasında yerləşən bağçada 2-3 otaqda məskunlaşıb.

Onun özünün dünya zinəti, sərvəti və artıq bir şeyi yox idi. Bunu istəmirdi. Hətta əksinə, ona gətirilən çoxlu hədiyyələri Allah yolunda verirdi. Onun özünə məxsus olanı və beytülmala aidiyyəti olmayanı da ümumi işlərə xərcləyirdi. Hətta öz şəxsi malından olsa belə, oğlu üçün 10 milyona, 15 milyona yaxşı bir ev almayan bu şəxs özünün şəxsi malı olan yüz milyonlarla sərvəti müxtəlif bölgələrə - abadlıq işlərinə, yoxsullara, seldən zərər çəkənlərə və digər işlərə xərcləyirdi. Bizim xəbərimiz vardı ki, bəzi yerlərdə insanlara verilən pullar imamın şəxsi pulları idi. Bunlar müridlərinin, sevənlərinin, dostlarının ona gətirdiyi hədiyyələr idi.

O, xəlvət və ibadət adamı, gecə ibadətində ağlayan, dua, münacat, Allahla mənəvi əlaqə, şeir, mənəviyyat, irfan, zövq və mənəvi hal adamı idi. Siması xalqın düşmənlərini qorxudan möhkəm sədd və güclü dağ, belə duyğusal və insani məsələlər qarşıya çıxdıqda zərif, mehriban bir insan olurdu. Mən bu hadisəni danışmışam: Səfərlərin birində bir xanım özünü mənə çatdırdı. Dedi ki, oğlum müharibədə əsir düşmüşdü. Bu yaxınlarda onun ölüm xəbərini verdilər. Mənim oğlum öldürülüb, lakin mühüm deyil. Mənim üçün mühüm olan imamın sağlığıdır. O xanım həyəcanla danışdığı bu sözləri imama çatdırmağımı istədi. Mən imamın yanına getdim. O, ayaq üstə dayanmışdı. Qadının sözünü ona danışdım. Gördüm ki, bu möhkəm, vüqarlı və uca dağ qəfildən güclü tufan önündə əyilən böyük bir ağac kimi büküldü, ruhu və bədəni bu şəhid anasının sözlərindən təsirləndi və gözləri yaşla doldu.

Bir gecə xüsusi bir məclisdə iki-üç nəfərlə birgə mərhum Hacı Əhməd ağanın evində oturmuşduq. İmam da oturmuşdu. Bizlərdən biri dedi ki, ağa, sizin mənəvi-irfani məqamınız var, bir neçə cümlə ilə bizə nəsihət edin. Böyük mənəviyyat sahibi olan bu əzəmətli insan bir şagirdinin - təbii ki, bizim hamımız imamın şagirdləri və övladları kimi idik; bizim rəftarımız da ata qarşısındakı övladın rəftarı kimi idi - qısa tərifi qarşısında utanıb elə xəcalət çəkdi və təvazökarlıq etdi ki, bu, onun rəftarında, üzündə və oturuş tərzində aydın şəkildə hiss olundu. Biz bu sözü deyib imamı utandırdığımıza görə xəcalət çəkdik. O şücaətli və əzəmətli insan mənəvi məsələlərdə belə təvazökar və həyalı idi.

Demək istədiyim son məqam budur ki, imam bunların hamısına dinə boyun əyməklə, təqva ilə və Allahın əmrinə itaətlə sahib olmuşdu. Onun özü də müxtəlif sözlərində dəfələrlə deyirdi ki, nə varsa, Allahdandır. O, hər şeyi Allahdan bilirdi, Allahın iradəsində, ilahi hökmdə həll olmuşdu: “İnqilabı Allah qalib etdi”; “Xürrəmşəhri Allah azad etdi”; “Xalqın qəlbini Allah bir yerə topladı”. O, hər şeyi Allahın baxışından görür və üzərinə düşəni yerinə yetirirdi. Allah-Taala da rəhmət qapılarını onun üzünə açdı.307


Yüklə 1,49 Mb.

Dostları ilə paylaş:
1   ...   4   5   6   7   8   9   10   11   ...   18




Verilənlər bazası müəlliflik hüququ ilə müdafiə olunur ©www.azkurs.org 2024
rəhbərliyinə müraciət

gir | qeydiyyatdan keç
    Ana səhifə


yükləyin