Məktəbəqədər təhsilin məzmununun yeniləşməsi bu gün aktual problem kimi qarşıda durur. Təhsilin ilk pilləsi olmaqla, məktəbəqədər təhsil uşaqların intellektual, fiziki və psixi inkişafını, sadə əmək vərdişlərinə yiyələnməsini, istedad və qabiliyyətinin üzə çıxarılmasını, sağlamlığının qorunmasını, estetik tərbiyəsini təmin edir. Ağılın, intellektin inkişaf etdirilməsi ön plana keçir. Dünyanın təhsil məkanında sadəcə bilik, bacarıqlar deyil, dəyərlər, səriştələr şəxsiyyətin inkişafında mühüm atributlar kimi qiymətləndirilir və bugünkü təhsilin keyfiyyət göstəriciləri kimi qəbul edilir. Bütün bunların formalaşdırılmasında tərbiyəçi müəllimin pedaqoji ustalığa, səriştəlilik məharətinə malik olması başlıca yerlərdən birini tutur. Tərbiyəçi müəllimin pedaqoji ustalığa malik olması uşaqların həm bir şəxsiyyət kimi, həm də yüksək intellektual səviyyədə formalaşmaları üçün mühüm zəmin təşkil edir. “Şəxsiyyəti şəxsiyyət yaradır” prinsipi baxımından tərbiyəçinin əsl örnək, nümunə, yüksək öyrətmək məharətinə malik olması, uşaqlarla münasibətində pedaqoji məharət göstərə bilməsi tərbiyəçini usta müəllim, pedaqoji prosesin aparıcısı səviyyəsinə qaldırır. Bu baxımdan “Pedaqoji kadr və etik davranışlar” fənni gələcək tərbiyəçi-müəllimlərin pedaqoji səriştəliliyə, müəllim üçün vacib kompotensiyalara yiyələnmələrində əsas fənn kimi çıxış edir.
Fənnin məqsədi
1. Gələcək tərbiyəçi-müəllimlərin pedaqoji ustalığa malik olmasının rol və əhəmiyyətinin tələbələr tərəfindən aydın dərk edilməsi. 2. Tərbiyəçi-müəllimlərin pedaqoji ustalığa yiyələnmələrinin mahiyyət və məzmununun tələbələrə aşılanması. 3. Tərbiyəçi- müəllimin pedaqoji ustalığına gedən yolların tələbələr tərəfindən aydın dərk edilməsi. 4. Tələbələdə tərbiyəçi müəllimlərin pedaqoji ustalığının ilk elementlərinin formalaşdırılması. 5. Tərbiyəçi müəllimlərin şəxsi və peşə keyfiyyətlərinin məzmununun tələbələr tərəfindən mənimsənilməsi və bunların pedaqoji ustalıq üçün zəruriliyin dərk edilməsi. 6. Pedaqoji ustalıq üçün vacib olan pedaqoji texnika və texnologiyaların tələbələrə öyrədilməsi.
