UOT 004.413 (075) DOI: 10.25045/jpis.v11.i1.07
Bayramova T.A.
AMEA, İnformasiya Texnologiyaları İnstitutu, Bakı, Azərbaycan
tamilla@iit.science.az
PROQRAM MÜHƏNDİSLİYİ STANDARTLARININ ANALİZİ
Daxil olmuşdur: 19.09.2019. Düzəliş olunmuşdur: 24.10.2019. Qəbul olunmuşdur: 30.10.2019.
Proqram mühəndisliyinin inkişafı proqram təminatının işlənilmə prosesinin daha da dinamik və
innovativ olmasını və onun hüquqi-iqtisadi bazasının gücləndirilməsini tələb edir. Sifarişçinin
tələblərinə cavab verə biləcək keyfiyyətli proqram təminatının işlənilməsi üçün onun normativ
bazası reqlamentləşdirilməli və standartlaşdırılmalıdır. Proqram təminatının həyat dövrü
proseslərini əhatə edən yüzlərlə beynəlxalq standartlar mövcuddur. Məqalədə proqram
mühəndisliyinin standartları təhlil edilmiş və proqram təminatının keyfiyyətinin idarə edilməsi
üçün onların tətbiqinin vacibliyi vurğulanmışdır. Bu standartların tətbiq sahələri və proqram
mühəndisliyi standartlarını işləyən əsas təşkilatlar haqda məlumat verilmişdir. Standartların
proqram təminatının müxtəlif xarakteristikaları üzrə klassifikasiyaları göstərilmişdir. Peşəkar
proqram mühəndislərinin hazırlanması prioritet sahələrdəndir. Onlar tədris müddətində proqram
təminatının işlənilməsi, sənədləşdirilməsi, proqramların həyat dövrünün idarə edilməsi,
menecment və s. bacarıqlara malik olmaq üçün geniş biliklər bazasına və bacarıqlara
yiyələnməlidirlər. Bu məqsədlə beynəlxalq təşkilatlar tərəfindən bir neçə tədris standartı
işlənilmişdir. Həmin standartlar araşdırılmış və Azərbaycanda milli tədrisin xüsusiyyətlərini
nəzərə alaraq peşəkar proqram mühəndislərinin hazırlanması üçün beynəlxalq standartlar
əsasında tədris proqramının işlənilməsinin aktuallığı vurğulanmışdır. Eyni zamanda, proqram
mühəndislərinə bu sahə üzrə mövcud olan baza standartlarının, standartların profillərinin və
onların tətbiqi məsələlərinin tədrisinin vacibliyi göstərilmişdir.
Standartların işlənilməsi və tətbiqi üzrə dünyada mövcud olan təcrübəyə əsaslanaraq
Azərbaycanda da proqram mühəndisliyi üzrə milli standartların işlənməsi və qəbul edilməsi
tövsiyə edilmişdir.
Dostları ilə paylaş: |
