QIRĞINDAN KEÇƏN UŞAQ
Usubov Xəyyam Şahin oğlu, 9 yaşında: —Biz saat 11-də babamgilin qarajına girdik. Bakıdan gəlmiş
Milli Ordu komandiri babamgildə yaralı yatırdı. O, üç gün əvvəl qaz kontoru yaxınlığındakı vuruşmada
yaralanmışdı. Saat ikinin yarısına qədər qarajda qaldıq. Atışma kəsmədiyini görüb, kənddən çıxdıq. Kəndi
yandırdılar. Anam soyunub, bizi çaydan keçirtdi. Çayı keçəndən sonra babamgili itirdik. Yolun yarısına kimi
Milli Ordunun əsgərləri ilə gəldik. Naxçıvanik yolunu keçəndə Kərim babanın nəvəsi Füzuli bizə çox kömək
etdi. Burda Əsgərana tərəf bir «UAZ» keçdi. Füzuli qumbaranı atıb onu partlatdı. Sonra atışma düşdü. Saday
dayı, Teymur dayı yaralandı. Çiçək isə təpənin üstündə öldü. Anam Zərifə ayağından yaralandı. Biz uzanıb
sürünürdük. hər tərəf meyidlə dolu idi. Mən qorxudan onlara baxa bilmirdim. Çox əzabla gəlib Şelliyə çatdıq.
Ancaq hələ də üç əmimdən — Zakirdən, Əliyardan, Elşaddan xəbər yoxdur...
Dostları ilə paylaş: | 
