Oilaviy nizolar. Ajralish, uning sabab va oqibatlari

Har qanday oilada er-xotinning o`zaro munosabatlarida nizoli vaziyatlarning yuzaga kelishi muqarrar. Lekin shu nizolarning xarakteri, ularning oqibatlariga ko`ra turli oilalar va ulardagi oilaviy munosabatlar bir-birlaridan farqlanadi. Shunday ekan biz dastavval muvaffaqiyatli va muvaffaqiyatsiz oilalarda ro`y beradigan nizolarni ko`rib chiqaylik. Rasmda ko`rinib turganidek, muvaffaqiyatli oilalardagi nizolar biriktiruvchi va muvaffaqiyatsiz oilalardagi nizolar esa ajratuvchi xarakterga ega. Shuning uchun ham psixologik adabiyotlarda nizolar shartli ravishda «qonstruktiv» («biriktiruvchi») va «destruktiv» («ajratuvchi») nizolarga farqlanadi. Ular, o`zlarining yuzaga kelishiga asos bo`lgan muammolar, bu muammolarning hal etilishi, kechishi, ishtirokchilari, oqibatlari va boshqalarning xarakteriga ko`ra bir-birlaridan farqlanadi.

Biriktiruvchi nizolarning yuzaga kelishiga asos bo`lgan muammolar va ularning hal qilinishi ham erning, ham xotinning, butun oilaning manfaatlariga qaratilgan bo`ladi. Agar ular hal etilsa, buning oqibatida oilaning umumiy manfaatlariga oid muammolar o`z yechimni topadi. Bunday nizolarga oiladagi tartib- intizom, ozodalik, oila byudjetini yuritish, saranjomlik, tejamkorlik, isrofgarchilikka yo`l qo`ymaslik, bola tarbiyasi va boshqa shu kabi toifadagi nizolar misol bo`la oladi. Ular asosan, er-xotin o`rtasidagina yuzaga keladi, ularning ishtirokchilari ham faqat er-xotinlarning o`zlarigina hisoblanadilar.

Ajratuvchi nizolarda ularning yuzaga kelishiga asos bo`lgan muammo va uning yechimi er-xotinlardan birining manfaatiga qaratilgan bo`ladi. Bunday nizolarda bir tomon manfaatining hal etilishi ko`pincha, ikkinchi tomon manfaatining boy berilishi hisobiga amalga oshadi. Masalan, er yoki xotinning shaxsan o`zi uchun biron nima xarid qilishi, erning yoki xotinning ishi tufayli, o`zbek oilasi uchun xarakterli bo`lgan nizolardan bo`lmish er yoki xotinning qarindosh-urug`lari bilan bo`ladigan munosabatlar tufayli yuzaga keladigan nizolar shular jumlasiga kiradi. Bunday vaziyatlarda manfaati boy berilgan tomonda norozilik, e`tiroz saqlanib qoladi va bu keyinchalik yana kuchayib navbatdagi nizoning yuzaga kelishiga asos bo`lib xizmat qilishi mumkin. Ajratuvchi nizolarda nizo hal etilgani bilan, nizoli vaziyat saqlanib qolaveradi.