BTQ-nin tikintisi üzrə razılaşma 2007-ci il fevralın 7-də Tbilisi (Gürcüstan) şəhərində Azərbaycan, Gürcüstan və Türkiyə dövlət rəhbərlərinin iştirakı ilə keçirilmiş tədbirdə baş tutmuşdur. Bu tədbirdə “Bakı-Tblisi-Qars yeni dəmiryolu xətti” haqqında üçtərəfli Saziş və “Bakı-Tblisi-Qars yeni dəmiryolu xətti layihəsinin həyata keçirilməsi çərçivəsində Marabda-Türkiyə Respublikası sərhədinə qədər (Kartsax) dəmir yolu sahəsinin maliyyələşdirilməsi, layihələndirilməsi, inşası, reabilitasiyarekonstruksiyası və istismarının prinsip və şərtləri haqqında” Azərbaycanla Gürcüstan arasında ikitərəfli Saziş və nəhayət Azərbaycan Respublikası Nəqliyyat Nazirliyi və “Marabda Kartsaxi Dəmir Yolu” MMM arasında “Bakı-Tblisi-Qars dəmiryolu xətti layihəsinin Marabda- Türkiyə Respublikası sərhədinə qədər dəmir yolu sahəsinin maliyyələşdirilməsi şərtlərinə dair Kredit Müqaviləsi” imzalanmışdır. 2011-ci il may ayının 18-də Bakı şəhərində ikitərəfli Sazişə bəzi əlavə və dəyişikliklər barədə Protokol imzalanmışdır. Bu dəyişiklər əsasında 2011-ci il iyul ayının 1-də Azərbaycan Respublikası Nəqliyyat Nazirliyi və “Marabda Kartsaxi Dəmir Yolu” MMM arasında yeni şərtlər çərçivəsində yeni Kredit Müqaviləsi imzalanmışdır.
