Ózbekstan respublikasí sanlí texnologiyalar ministrligi muhammed al-xorezmiy atindaǵÍ tashkent informaciyalíq texnologiyalarí universiteti

SHÍMBAYDA JAŃA ILIM DÁRGAYÍ ASHÍLDÍ
Annotaciya: Bul maqalada Ózbekstan Respublikası Prezidentiniń usı jıl 23-24-fevral kúnleri Qaraqalpaqstan Respublikasına saparı hám onıń juwmaqlarına baǵıshlanǵan májilis protkolında Qaraqalpaq mámleketlik universitetiniń Shımbay fakultetin shólkemlestiriw haqqındaǵı kórsetpesi tiykarında Ózbekstan Respublikası Mámleketlik joqarı bilimlendiriw shólkemlerine oqıwǵa qabıl etiw procesin muwapıqlastırıw boyınsha Mámleketlik komissiyanıń 2022-jıl 4-iyul kúngi 1-sanlı májilis protokolı menen Qaraqalpaq mámleketlik universitetiniń Shımbay fakulteti ushın 2022-2023-oqıw jılına óz aldına 95 orınlıq kvota ajıratılıwı haqqında tolıq maǵlıwmatlar kórsetilip ótilgen.
Ózbekstan Respublikası Prezidenti Shavkat Mirziyoev «Jańa Ózbekstan» baǵında ótkerilgen pútkil xalqımızdıń ullı bayramı esaplanǵan – Ǵárezsizlik kúni bayramında shıǵıp sóylegen sózinde, «Jańa Ózbekstan degende, hár bir puqarası ushın ǵamxorlıq etetuǵın, ashıq hám ádalatlı jámiyet dep túsiniledi.
Bul joqarı sheklerge erisiw 2026-jılǵa shekemgi Rawajlanıw strategiyası sheńberinde keyingi jumıslarımızdı 5 tiykarǵı wazıypa boyınsha shólkemlestiremiz.
Birinshiden, bilimlendiriw tarawında perzentlerimiz zamanagóy bilim hám kónlikpelerdi puqta iyelewi ushın eń qolaylı sharayatlar jaratıwdı izbe-iz dawam ettiremiz. Onıń ushın mekteplerdiń oqıw baǵdarlamaları, oqıtıw metodikası, sabaqlıqlar mazmunı túpkilikli qayta kórip shıǵıladı.
Bul sistema aldın aldınǵı sırt el qánigeleri tárepinen ekspertizadan ótkerilip, soń turmısqa engiziledi. Nátiyjede Jańa Ózbekstannıń mektep pitkeriwshisi zamanagóy kónlikpelerdi iyelegen, málimleme texnologiyaların puqta ózlestirgen, kreativ pikirleytuǵın, erkin qarar qabıl ete alatuǵın, oy-órisi keń shaxs bolıp jetisedi. Onıń ushın barlıq aymaqlarımızda, ásirese, awıllıq jerlerde mektepler qurıw, olardı maman pedagog kadrlar menen támiyinlew máselelerine ayrıqsha itibar beremiz», – degen edi.
Búgingi kúni jámiyetshiligimiz turmısında bunıń ayqın mısalın kórmektemiz. Atap aytqanda, Ózbekstan Respublikası Prezidentiniń usı jıl 23-24-fevral kúnleri Qaraqalpaqstan Respublikasına saparı hám onıń juwmaqlarına baǵıshlanǵan májilis protkolında Qaraqalpaq mámleketlik universitetiniń Shımbay fakultetin shólkemlestiriw kórsetilgen edi. Usı protokol tiykarında Ózbekstan Respublikası Mámleketlik joqarı bilimlendiriw shólkemlerine oqıwǵa qabıl etiw procesin muwapıqlastırıw boyınsha Mámleketlik komissiyanıń 2022-jıl 4-iyul kúngi 1-sanlı májilis protokolı menen Qaraqalpaq mámleketlik universitetiniń Shımbay fakulteti ushın 2022-2023-oqıw jılına óz aldına 95 orınlıq kvota ajıratılıp, oǵan 2022-2023-oqıw jılında ámeliy psixologiya, inglis tili, matematika, qaraqalpaq tili bakalavr tálim baǵdarları boyınsha studentler qabıllandı.
7-sentyabrde arqa rayonlar xalqı turmısında áhmiyetli orın tutatuǵın usı jańa joqarı oqıw ornınıń ashılıw máresimi bolıp ótti.
Oǵan Berdaq atındaǵı Qaraqalpaq mámleketlik universitetiniń rektoratı, professor-oqıtıwshıları, rayon hákimligi basshıları, deputatlar hám keń jámiyetshilik wákilleri qatnastı.
Shımbay fakultetiniń ashılıw máresiminde rayon hákimi A.Tajetdinov, Berdaq atındaǵı Qaraqalpaq mámleketlik universitetiniń rektorı A.Reymovlar jıynalǵanlardı Ózbekstan Respublikası Ǵárezsizliginiń 31 jıllıq bayramı hám jańa fakultettiń ashılıwı menen qızǵın qutlıqlap, dáslepki studentlerge «Studentlik gúwalıqlar»ın tapsırdı.
Sońınan oqıw dárgayı aldına kese tartılǵan dástúriy lenta kesilip, ilaj qatnasıwshıları fakultettiń ishki múmkinshilikleri, studentler ushın jaratılǵan imkaniyatlar menen jaqınnan tanısıp, keleshekte bul ilim dárgayınan elimizge belgili kámil insanlar jetilisip shıǵatuǵınlıǵına isenim bildirdi.
– Burın rayonımız jasları Nókis hám Tashkent qalalarında jaylasqan joqarı oqıw orınlarında oqıp bilim alar edi. Al, endi bolsa, ózimizdiń Shımbayda bilim alatuǵın boldı. Bunıń ushın Prezidentimizge sheksiz minnetdarshılıq bildiremiz, – deydi nuranıy atalarımızdıń biri Baxtiyar Yusupov.
Adilbay ORAZOV,
Qaraqalpaqstan xabar agentligi sholıwshısı.