Kirish Respublikamiz Prezidenti I.A.Karimov 2011 yili 30 sentyabrda Namangan va Andijon viloyatlariga tashrifi chog’ida qishloq xo’jalik ekinlarini begona o’t va zararkunanda hasharotlardan himoya qilishda biologik usuldan keng foydalanish zarurligini alohida ta’kidladi. Vazirlar mahkamasining 2011 yili 5- dekabrdagi yig’ilishi aynan shu masalaga bag’ishlangan bo’lib, qishloq xo’jalik ekinlarini begona o’tlar, kasallik va zararkunandalardan uyg’unlashgan tizimda himoya qilish dasturi qabul qilindi.
Bizning sharoitimizda dukkakli don ekinlarida 37 turdan ortiq zararli hasharotlar oziqlanadi. Kerakli qarshi kurash choralari ko’rilmagan taqdirda ular dukkakli don ekinlarining 35-40% gacha hosilini yo’qotishi mumkin. Shu sababli dukkakli don ekinlarida oziqlanuvchi zararkunanda hasharotlarning asosiy turlarini aniqlash va ularga qarshi ekologik zararsiz biologik kurash choralarini ishlab chiqish va bu bilan atrof muhitini zararli pestisidlar bilan ifloslanishining oldini olish dolzarb masala bo’lib hisoblanadi. Dukkakli don ekinlarini zararkunandalardan himoya qilishda tabiiy entomofaglar faoliyatidan foydalanish ayniqsa muhimdir.
Entomofaglarni biolaboratoriyalarda sun’iy ko’paytirib dalalarga chiqarish ular samaradorligini yanada oshiradi.
Dukkakli don ekinlarida oziqlanuvchi zararkunanda hasharotlarning asosiy turlarini aniqlash va ularga qarshi qo’llaniladigan kurash vositalarining ekologik jihatdan zararsiz biologik usullarini ishlab chiqish va qo’llash yo’llarini joriy qilish hamda dukkakli don ekinlari zararkunandalarining asosiy entomofaglarini tanlab olib ular faoliyatidan samarali foydalanish usullarini ishlab chiqish.
