Sosial pedaqogikanin mövzusu və VƏZİFƏLƏRİ Plan

4. Sosial pedaqogikanın prinsipləri

“Prinsip” (latınca “principium) yunan sözü olub, əsas, ilkin deməkdir. Sosial pedaqoji ədəbiyyatda sosial pedaqogikanın aşağıdakı prinsiplərini ayırd edirlər:

Təbiətəmüvafiqlik prinsipi. İnsan-sosial varlıqdır və sosial təbiətin qanunları çərçivəsində fəaliyyət göstərir, inkişaf edir. O bu qanunların tələblərinə müvafiq fəaliyyət göstərdikdə daha çox uğur qazanır, əks halda isə onun uğurları azalır. Təbiətəmüvafiqlik prinsipinin mahiyyəti də elə bununla əlaqəlidir, yəni insanı sosial təbiətin qanunları çərçivəsində, onun təbii imkanlarını nəzərə alaraq inkişaf etdirmək gərəkdir. Məlum olduğu kimi, hər bir insan anadan olarkən müəyyən imkanlarla doğulur. Bu imkanlar təkrarolunmaz xarakter daşıyaraq, hər bir insanın özəlliyini təşkil edir. Sosial tərbiyə prosesində sosial pedaqoq bu təbii imkanları müəyyənləşdirib, həmin imkanların inkişaf qanunlarına istinad edərək, onların inkişafına köməklik göstərməlidir. Təbiətəmüvafiqlik prinsipinin tələbi elə bundan ibarətdir.