D i f f u z i y a t a b a l m a s ı . Belə tabalma növü poladda daxili kristal likvasiyası müşahidə edildiyi hallarda tətbiq edilir. Austenit dənəciklərində metalın tərkibi karbonun və digər qatışıqların bərk halda diffuziyası yolu ilə bərabərləşdirilir. Nəticədə polad bircinsli olur. Buna görə də diffuziya üçün tabalmaya homogenləşdirmə də deyilir.(homogen polad). Homogenləşdirmə temperaturu kifayyət qədər yüksək olmalıdır. Lakin dənəciklərin yanmasına və əriməsinə yol vermək olmaz. Dənəciklər yandıqda hava oksigeninin metal hissəcikləri ilə birləşməsi nəticəsində oksid pərdəcikləri əmələ gəlir ki, onlar da dənəcikləri bir-birindən aralayır. Metalda yanıq əmələ gəldikdə onu aradan qaldırmaq mümkün olmur, buna görə də ifrat yandırılmış metal tam çıxdaş edilir. Diffuziya üçün tabalmada adətən iri dənəciklər alınır; onları sonradan tamam tabalma yolu ilə islah etmək (xırda dənəciklər şəklinə salmaq) lazım gəlir.
